ស្របពេលការឃោសនារកសំឡេងឆ្នោតតំណាងរាស្ត្រនីតិកាលទីប្រាំដែល ប្រព្រឹត្តទៅនៅថ្ងៃទី២៨ ខែកក្កដា ខាងមុខនេះ នៅតាមដងផ្លូវ និងបណ្តាញផ្សព្វផ្សាយនានា លើទំព័រហ្វេសប៊ុកសប្តាហ៍នេះក៏មិនបានរំលងការចាប់អារម្មណ៍លើរឿងនេះដែរ។
ទំព័រហ្វេសប៊ុក ឈ្មោះ I Love Cambodia Hot News បានបង្ហោះរូបភាពយុវតីពីររូប ដែលម្នាក់នៅឆ្វេងដៃពាក់មួកដាក់ស្លាកសញ្ញាគណបក្សប្រជាជនកម្ពុជា ហើយកញ្ញាម្នាក់ទៀត ដាក់ស្លាកគណបក្សសង្គ្រោះជាតិ ព្រមទាំងអមទៅដោយអក្សរធំៗពណ៌ក្រហមចោទជាសំណួរឡើងថា «ស្អាតដូចគ្នា យកមួយណា?»។
ការដាក់បង្ហោះនេះទទួលបានការចុចគាំទ្រចំនួន ៣,១៤១ និងចែកចាយបន្តចំនួន ១៤៨ ក្នុងរយៈពេលប្រាំម៉ោងដំបូង ព្រមទាំងមតិជាច្រើនពីអ្នកលេងហ្វេសប៊ុក មានទាំងមតិគាំទ្រ និងបដិសេធ។
ជាក់ស្ដែង ShokryVsCharya ដែលលើកសរសើរគណបក្សប្រជាជនកម្ពុជា បាននិយាយថា៖ «៤ អ្នកដឹកនាំមានសីលធម៌» ហើយ KuysimEng និង De Lievery Love បានបន្ទរការជូនពរថា៖ «សូមឲ្យ៤ឈ្នះ»។
ចំណែកឯ BrossBremBrey បានបញ្ចេញមតិថា៖ «៤ស្អាតដោយរូប រីឯ៧ស្អាតដោយចរិយាសមសួន សមជានារីខ្មែរ ខ្ញុំសុំរើសយកលេខ៧»។ KominDaVaraun យល់ស្របដោយសរសេរអក្សរ អង់គ្លេស ជាពាក្យខ្មែរថា៖ «លេខ៤សា្អត តែលេខ៧រម្យទម សុភាពរាបសា ហើយស្អាតទៀត»។
មានមតិបញ្ចេញជាច្រើនបានលើកឡើងថា ខ្លះចង់យកទាំងពីរ ខ្លះនិយាយថា មិនបានទេយកតែមួយបានហើយហើយអ្នកខ្លះទៀតថា ពេញចិត្ត តែទាស់ចិត្ត។
មិនស្អាតមិនសង្ហា បានសរសេរថា៖ «ពេញចិត្តលេខ៤ណាស់ មិនដឹងម៉េចបោះឲ្យ៧ទៅវិញ»។
Nin Ja បានបន្ទរថា៖ «ស្រឡាញ់ A តែដើម្បីជាតិយក B សិនហើយ»។
ចំពោះ អ្នកដែលចង់ជ្រើសរើសទាំងពីរ ត្រូវបាន Jake Thy ឆ្លើយតបវិញថា៖ «បើមនុស្សអាចឲ្យយកទាំងពីរ តែបោះឆ្នោតឲ្យយកតែមួយទេ»។
Khmer Man គិតថា ការបោះឆ្នោតគឺជាការសម្ងាត់ ហើយគេនឹងបោះឲ្យម្នាក់ក្នុងចំណោមអ្នក ទាំងពីរ។
ចំពោះ Vi Reakវិញ សម្តែងការមិនពេញចិត្តចំពោះការសួរសំណួរខាងលើដោយបានលើកឡើងថា៖ «ចាំតែមើលទៅដឹងហើយ កុំសួរសំណួរអ៊ីចឹង យ៉ាប់មែន»៕
ប្រភពពី ភ្នំពេញប៉ុស្តិ៍
