ភ្នំពេញ: វាជាពាក្យដ៏ពេញនិយមហើយបានធ្វើអោយកក្រើកដល់ប្រទេសកម្ពុជាទាំងមូល។ ការបោះឆ្នោតបានបញ្ចប់ កាលពីថ្ងៃអាទិត្យ គឺជាការប្រកួតប្រជែងបែបប្រជាធិបតេយ្យតទល់របស់មនុស្សពីរក្រុមនៅក្នុងប្រទេសកម្ពុជានោះគឺ ក្រុម “ដូរ” ដែលចង់អោយមានការផ្លាស់ប្តូររបបគ្រប់គ្រងនិងក្រុម “មិនដូរ” ដែលចង់រក្សារបបគ្រប់គ្រងនៅដដែល។
លទ្ធផលបោះឆ្នោតបានបង្ហាញថាគណបក្សកាន់អំណាចគឺគណបក្សប្រជាជនកម្ពុជាទទួលបាន៦៨ អាសនៈ និងគណបក្សសង្គ្រោះជាតិ ទទួលបាន៥៥អាសនៈ។ លទ្ធផលនេះមានន័យថានឹងមិនមានការផ្លាស់ប្តូរ របបគ្រប់គ្រងទេ ហើយគណបក្សប្រជាជននឹងបន្តដឹកនាំប្រទេសយ៉ាងហោចណាស់ប្រាំឆ្នាំដោយមានសម្តេចហ៊ុនសែនធ្វើជានាយករដ្ឋមន្ត្រីទៀតផងដែរ។ ដូច្នេះប្រជាជនកម្ពុជាភាគច្រើនបានសម្រេចចិត្តថា “មិនដូរ” ហើយនៅតែទុកចិត្គណបក្សប្រជាជនកម្ពុជាជាងគណបក្សផ្សេងទៀតនៅក្នុងការដឹកនាំប្រទេស។ មនុស្សគ្រប់គ្នាត្រូវតែគោរពឆន្ទៈរបស់អ្នកបោះឆ្នោត។
ប៉ុន្តែបើពិនិត្យអោយជ្រៅទៅនោះគឺប្រជាជនចង់អោយមានការផ្លាស់ប្តូរមួយដ៏ប្រយ័ត្នប្រយ៉ែងដោយមិនធ្វើការផ្លាស់ប្តូរក្រោមសម្ពាធពីខាងក្រៅទេប៉ុន្តែគឺជាការផ្លាស់ប្តូរចេញពីខាងក្នុងដែលនឹងអាចធ្វើឡើងដោយគណបក្សប្រជាជនកម្ពុជាផ្ទាល់។ នេះប្រហែលជាជម្រើសនៃការផ្លាស់ប្តូរដែលល្អបំផុត សម្រាប់ស្ថានភាពនៅកម្ពុជា។ គណបក្សប្រជាជនកម្ពុជា ទំនងជាបានត្រៀមខ្លួនស្រេចហើយ ដើម្បីការផ្លាស់ប្តូរដ៏ស្ងៀមស្ងាត់មួយនេះ សម្រាប់អនាគត នយោបាយរបស់ខ្លួនផង និងសម្រាប់អនាគតប្រទេសជាតិផង។
លោក ខៀវ កញ្ញារីទ្ធ រដ្ឋមន្ត្រីក្រសួងព័ត៌មាននិងអ្នកនាំពាក្យគណបក្សប្រជាជនកម្ពុជាបាននិយាយថា គណបក្សប្រជាជនកម្ពុជា មិនសូវជាពេញចិត្តចំពោះលទ្ធផលនេះទេ ទោះបីជាគណបក្សប្រជាជនកម្ពុជា បានឈ្នះ ការបោះឆ្នោតនេះក្តី។ លោកបានលើកឡើងថាលទ្ធផលនេះគឺជាការដាស់តឿនមួយសម្រាប់គណបក្សប្រជាជនកម្ពុជា។ ប៉ុន្តែលោកក៏ទាក់ទាញអារម្មណ៍ផងដែរថាចំណុចខ្លាំងរបស់គណបក្សប្រជាជនកម្ពុជាគឺការសម្របសម្រួលខ្លួនទៅតាមស្ថានភាព។
ទោះបីជាមិនមានការពេញចិត្តខ្លះចំពោះការដឹកនាំរបស់គណបក្សប្រជាជនកម្ពុជាក្តី អ្នកបោះឆ្នោតនៅតែគិតថាគណបក្សប្រជាជនកម្ពុជានៅតែជាជម្រើសដែល្អសម្រាប់ពួកគេ។ ប៉ុន្តែអ្នកបោះឆ្នោតក៏បានប្រាប់ដល់គណបក្សកាន់អំណាចអោយប្រយ័ត្នផងដែរសម្រាប់អនាគតហើយត្រូវបំពេញការងារដែលមានប្រសិទ្ឋភាពជាងអាណត្តិកន្លងមក។ គណបក្សប្រជាជនកម្ពុជាបានមានចំនួនកៅអីនៅរដ្ឋសភាធ្លាក់ចុះជាង២០ជាចំនួនមួយដែលតម្រូវអោយគណបក្សកាន់អំណាចត្រូវពិនិត្យឡើងវិញនូវសកម្មភាព ប្រសិទ្ធភាព និង ការទំនាក់ទំនងរវាងមន្ត្រីនិងប្រជាជន។
ទោះបីជាគណបក្សប្រជាជនកម្ពុជាត្រូវបានផ្តល់ការទុកចិត្តអោយកាន់អំណាចបន្តទៀតក្តី អ្នកបោះឆ្នោតចង់ប្រាប់ដល់គណបក្សប្រជាជនអោយប្រឹងប្រែងបន្ថែមទៀតនៅក្នុងការដោះស្រាយបញ្ហាសង្គមនិងជីវភាពដែលប្រជាជនកម្ពុជាកំពុងប្រឈមមុខ។
ការលុបបំបាត់អំពើពុករលួយគ្រប់លំដាប់ថ្នាក់ ការកសាងវិស័យសុខាភិបាលដ៏មាំទាំមួយ ការលើកកម្ពស់វិស័យអប់រំទាំងបរិមាណនិងគុណភាព ការដំឡើងប្រាក់ខែសម្រាប់កម្មករនិងមន្ត្រីរាជការ ការកាត់បន្ថយភាពមិនសប្បាយចិត្តចំពោះសេវាសាធារណ: និងការកាត់បន្ថយគម្លាតរវាងអ្នកមាននិងអ្នកក្រគឺស្ថិតនៅក្នុងចំណោមបញ្ហាដែលគណបក្សប្រជាជនត្រូវគិតគូរបន្ថែមទៀតដើម្បីអនាគតនយោបាយដ៏វែងឆ្ងាយរបស់ខ្លួនក៏ដូចជាអនាគតកម្ពុជាទាំងមូល។
តាមរយ:លទ្ធផលនៃការបោះឆ្នោតនេះ គណបក្សប្រជាជនក៏ទំនងជានឹងបង្កើនប្រសិទ្ធភាពការងារបស់ខ្លួន នៅក្នុងការបម្រើដល់ផលប្រយោជន៍ប្រជាជននិងប្រទេសអោយកាន់តែខ្លាំងក្លាដើម្បីបង្កើនការទុកចិត្ត ពីប្រជាជនកម្ពុជា និងអ្នកបោះឆ្នោត។ គណបក្សប្រជាជននឹងត្រូវធ្វើការកែទម្រងមួយដើម្បីឆ្លើយតបទៅនឹងចំណុចខ្សោយ ដែលខ្លួនមាន ដើម្បីបំពេញតាមសេចក្តីត្រូវការរបស់អ្នកបោះឆ្នោត។ នោះគឺជាការផ្លាស់ប្តូរមួយដែលនឹងសម្រេច ដោយគណបក្សប្រជាជនផ្ទាល់ហើយវា មិនមែនជាការផ្លាស់ប្តូររបបគ្រប់គ្រងដែលអាចនឹងនាំដល់ អស្ថិរភាពនយោបាយនោះឡើយ។ វាគឺជាការផ្លាស់ប្តូរដ៏ទន់ភ្លន់មួយដែលមនុស្សគ្រប់គ្នាសមល្មមនឹងសប្បាយចិត្ត៕
ប្រភពពី CEN
0 comments:
Post a Comment