គណបក្សសង្គ្រោះជាតិ បានផ្សព្វផ្សាយនូវសេចក្តីប្រកាសគាំទ្រគណបក្សប្រឆាំងរបស់ប្រធានអង្គការសមាគមចំនួន ៣ រួមមាន៖ លោក ម៉ម សូណង់ដូ ប្រធានសមាគមអ្នកប្រជាធិបតេយ្យ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងលោក ស៊ាន ប៉េងសែ ប្រធានគណៈកម្មការព្រំដែនកម្ពុជា។តាមសេចក្តីប្រកាស ក្នុងនាមជាប្រធានអង្គការសមាគមទាំងបីរូប បានសុំឲ្យសមាជិករបស់ខ្លួន ទៅបោះឆ្នោតឲ្យគណបក្សសង្គ្រោះជាតិ ដែលមានលេខរៀងទី៧ សញ្ញាព្រះអាទិត្យ លើសន្លឹកឆ្នោត នៅថ្ងៃទី២៨កក្កដា។ សេចក្តីប្រកាសដូច្នេះ ត្រូវបានគណបក្សសង្គ្រោះជាតិ ចាត់ទុកថា ជាសុឆន្ទៈមហាជនខ្មែរ ក្នុងគោលបំណងបង្រួបបង្រួមជាតិ ផ្សះផ្សាជាតិ ឯកភាពជាតិ ដើម្បីរួមគ្នាសង្គ្រោះជាតិ។
ក្នុងខណៈការបោះឆ្នោតអាណត្តិទី៥នៅសល់តែជាង ១០ថ្ងៃទៀតនោះ សមាគមក្នុងស្រុកចំនួន២ និងសមាគមក្រៅស្រុកមួយ ដែលមាននិន្នាការទៅកាន់គណបក្សប្រឆាំង បានស្នើឱ្យសមាជិករបស់ខ្លួនបោះឆ្នោតគាំទ្រគណបក្សសង្គ្រោះជាតិ។ នេះបើតាម សេចក្តីប្រកាសព័ត៌មានរបស់គណបក្សសង្គ្រោះជាតិ កាលពីថ្ងៃពុធទី១០ កក្កដានេះ។
សេចក្តីប្រកាសព័ត៌មានដដែលនោះ បានបញ្ជាក់ថា លោក ម៉ម សុណង់ដូ ប្រធានសមាគមអ្នកប្រជាធិបតេយ្យ និង លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ រួមទាំងលោក ស៊ាន ប៉េងសែ កំពុងរស់នៅបរទេសនោះ បានស្នើឱ្យសមាជិករបស់ខ្លួនទាំងអស់ទៅបោះឆ្នោតឱ្យគណបក្សសង្គ្រោះជាតិ នៅថ្ងៃទី២៨ ខែកក្កដាខាងមុខ។
តែសម្រាប់លោក សោម អូន ក្រុមប្រឹក្សាសហជីពជាតិកម្ពុជាវិញ ដែលមាននិន្នាកាគាំទ្ររដ្ឋាភិបាលវិញ ក៏បានប្រកាសគាំទ្រគណបក្សប្រជាជនកម្ពុជាដែលជាគណកប្សកាន់អំណាចដែរ។
គួររំលឹកថា ការបោះឆ្នោតនៅអាណត្តិទី៥នេះ ដែលកំពុងឈានមកដល់នេះ ស្ថានភាពនយោបាយកំពុងពុះកញ្ជ្រោល ព្រោះថា លោកសម រង្ស៊ី ដែលជាប្រធានគណបក្សសង្គ្រោះជាតិ កំពុងនិរទេសខ្លួននៅប្រទេសបារាំងនោះ ក៏ប្រកាសវិលចូលកម្ពុជានៅមុនការបោះឆ្នោតថ្ងៃ២៨កក្កដាដែរ។ ដែលការវិលចូលនេះ គឺលោក សម រង្ស៊ី ហ៊ានប្រឈមការជាប់ពន្ធនាគារនៅកម្ពុជា។
តែទោះជាយ៉ាងណា ទាក់ទិននឹងការប្រកាសគាំទ្រគណបក្សនីមួយៗនោះ សហជីពប្រជាធិបតេយ្យកម្មករកាត់ដេរកម្ពុជា របស់លោក អាត ធន់ ដែលអះអាងថាមិនចូលបក្សសម្ព័ន្ធនោះ ធ្លាប់បានប្រាប់វិទ្យុបារាំងRFI ថា ការប្រកាសគាំទ្ររបស់សមាគម គឺបាត់បង់នៅឯករាជភាព និងជំនឿ ព្រោះសមាគមគឺជាអង្គការមួយរក្សាភាពអព្យាកឹត មិនចូលបក្សសម្ព័ន្ធ៕
ប្រភពពី RFI
