ភ្នំពេញៈ សភាសហរដ្ឋអាមេរិកនឹងបើកសវនាការនៅថ្ងៃនេះដែលមិនធ្លាប់មានពីមុនមក អំពីការបោះឆ្នោតនៅកម្ពុជា ដើម្បីធ្វើការពិភាក្សា ថាតើជំនួយបរទេសរបស់ប្រទេសមហាអំណាចមួយនេះ គួរត្រូវពិនិត្យឡើងវិញឬយ៉ាងណា ប្រសិនបើការបោះឆ្នោតនៅចុងខែកក្កដានេះ ពុំសេរី និងយុតិ្តធម៌។
តំណាងពីអង្គការលីកាដូ អង្គការឃ្លាំមើលសិទិ្ធមនុស្ស និងវិទ្យាស្ថានជាតិប្រជាធិបតេយ្យ គ្រោងនឹងផ្តល់ចម្លើយ ជាមួយនឹងនាយកប្រតិបតិ្តនៃក្រុមហ៊ុនវិនិយោគនៅទីផ្សារងើបឡើងហៅថា SRP International Group។ នេះបើយោងតាមគណៈកម្មាធិការរដ្ឋសភាស្តីពីកិច្ចការ ការបរទេស។
សវនាការក្រោមប្រធានបទ «វិបតិ្តសង្គម និងនយោបាយដែលជិតកើតឡើងនៅកម្ពុជា» ដែលធ្វើឡើងដោយគណៈកម្មាធិការអាស៊ីប៉ាស៊ីហ្វិកនៃរដ្ឋសភាអាមេរិកគឺធ្វើឡើងក្នុងរយៈពេលមិនដល់មួយខែផង បន្ទាប់ពីព្រឹទ្ធសមាជិកអាមេរិកពីររូបបានជំរុញឲ្យពិចារណាឡើងវិញលើការផ្តល់ជំនួយដល់កម្ពុជា។
ប្រភពពី ភ្នំពេញ ប៉ុស្តិ៍
