នៅថ្ងៃទី២៣ខែកក្កដាឆ្នាំ២០១៣ វេលាម៉ោង០៨ព្រឹកនេះ លោក សយ សុភាព ចាងហ្វាងកាសែតដើមអម្ពិល នឹងត្រូវឡើងតុលាការសាលាឧទ្ធរណ៍ ដើម្បីជំនុំជម្រះរឿងក្ដីព្រហ្មទណ្ឌក្រោមបណ្ដឹងរបស់លោក ទូច គង្គា ថៅកែកាសែតនគរវត្ដដែលប្ដឹងចោទប្រកាន់ពីបទបរិហារកេរ្ដិ៍ និងបទប៉ះពាល់ដល់ការឆ្លើយឆ្លងតាមលិខិត ។
ការកំណត់ពេលវេលាបើកសវនាការរបស់សាលាឧទ្ធរណ៍ក្នុងសំណុំរឿងទំនាស់ដ៏ក្ដៅគគុករវាងលោក សយ សុភាព និងលោក ទូច គង្គា នាពេលនេះ គឺជាលើកទី២ហើយ បន្ទាប់ពីសាលាឧទ្ធរណ៍បានសម្រេចពន្យារពេលសវនាការលើកទី១កាលពីថ្ងៃទី២២ខែឧសភាឆ្នាំ២០១៣កន្លងមក ។
កាលពីថ្ងៃទី២៨ខែមីនាឆ្នាំ២០១១ លោក ទូច គង្គា នាយកគ្រប់គ្រងកាសែតនគរវត្ដ និងជានាយការិយាល័យព័ត៌មានទូទៅ នៃស្នងការដ្ឋានព័ត៌មាននិងសន្ដិសុខនៃកងរាជអាវុធហត្ថលើផ្ទៃប្រទេស បានប្ដឹងលោក សយ សុភាព នាយកគ្រប់គ្រងកាសែតដើមអម្ពិល និងជាអ្នកវិភាគព័ត៌មាននៅស្ថានីយ៍ទូរទស្សន៍បាយ័ន (អតីតអ្នកវិភាគនៅស្ថានីយ៍ទូរ ទស្សន៍ស៊ីធីអិន) និងជាអ្នកល្បីជាប់ឈ្មោះថា “អ្នកកាសែតមិនចំជាអ្នកកាសែត” ពីបទបរិហារកេរ្ដិ៍ និងពីបទប៉ះពាល់ដល់ការឆ្លើយឆ្លងតាមលិខិត“សារអេឡិចត្រូនិច” ទៅអយ្យការអមសាលាដំបូងរាជធានីភ្នំពេញ ។
ក្នុងបណ្ដឹងរបស់ លោក ទូច គង្គា ក៏បានប្ដឹងទាមទារជំងឺចិត្ដពីលោក សយ សុភាព ជាទឹកប្រាក់ចំនួន៥.០០០(ប្រាំពាន់) ដុល្លារអាមេរិកផងដែរ ។ ថ្វីដ្បិតទទួលរងការប្ដឹងចោទប្រកាន់របស់លោក ទូច គង្គា បែប នេះក្ដី ក៏លោក សយ សុភាព ដែលមានឈ្មោះជាជនត្រូវចោទ មិនត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនបណ្ដោះអាសន្នអ្វីទេ ហើយត្រូវបានចៅក្រមជំនុំជម្រះសាលាដំបូងរាជធានីភ្នំពេញសម្រេចឱ្យជនជាប់ចោទឈ្មោះ សយ សុភាព បានរួចផុតពីបទចោទប្រកាន់ថែមទៀតផង កាលពីដើមឆ្នាំ២០១២កន្លងមក ។ ប៉ុន្ដែការសម្រេចរបស់សាលាដំបូងរាជធានីភ្នំពេញនេះ ត្រូវបានលោក ទូច គង្គា ជាដើមបណ្ដឹងរដ្ឋប្បវេណី ដាក់ពាក្យបណ្ដឹងឧទ្ធរណ៍បន្ដទៀត ទើបបង្កើតបានជាសំណុំរឿងព្រហ្មទណ្ឌលេខ៣៥៧ ចុះថ្ងៃទី២៣ខែមេសាឆ្នាំ២០១២ របស់សាលាឧទ្ធរណ៍ទល់បច្ចុប្បន្ន ។
រឿងរ៉ាវលោក សយ សុភាព ឡើងតុលាការសាលាឧទ្ធរណ៍នាពេលនេះ គឺចំពេលដែលលោក សយ សុភាព បាននិងកំពុងទទួលរងការវាយប្រហាររិះគន់យ៉ាងចាស់ដៃពីប្រិយមិត្ដនៃបណ្ដាញព័ត៌មានសង្គមហ្វេសប៊ុក(Facebook) ដោយមានការទាក់ទងនឹងការចុះផ្សាយព័ត៌មានលម្អៀង និងខ្វះភាពការពិតត្រឹមត្រូវផង និងទាក់ទងនឹងការធានាអះអាងជុំវិញដំណើរ មាតុភូមិនិវត្ដន៍របស់ឯកឧត្ដម សម រង្ស៊ី ប្រធានគណបក្សសង្គ្រោះជាតិផង ដ្បិតប្រិយមិត្ដហ្វេសប៊ុកលើកឡើងថា លោក សយ សុភាព ធ្លាប់អះអាងថា ឯកឧត្ដម សម រង្ស៊ី មិនអាចវិលចូលស្រុកវិញបានទេ ប៉ុន្ដែបើឯកឧត្ដម សម រង្ស៊ី អាចវិលចូល ស្រុកវិញបានមែននោះ គឺលោកនឹងកោរត្រងោល ។ ឥឡូវ ឯកឧត្ដម សម រង្ស៊ី ប្រធានគណបក្សសង្គ្រោះជាតិ បានធ្វើមាតុភូមិនិវត្ដន៍មកដល់ព្រះរាជាណាចក្រ បានរយៈពេល៤ថ្ងៃហើយ ប៉ុន្ដែគេមិនទាន់ឃើញលោក សយ សុភាព គោរពពាក្យសម្ដីរបស់ខ្លួន ដើម្បីធ្វើការកោរត្រងោលនៅឡើយ ។
មជ្ឈដ្ឋានអ្នកច្បាប់និងអ្នកសារព័ត៌មាននានាកំពុងទន្ទឹងរង់ចាំតាមដានមើលអំពីដំណើររឿងក្ដីរវាងលោក សយ សុភាព និង លោក ទូច គង្គា តើនរណាជាអ្នកឈ្នះ ? ឈ្នះទាំងពីរនាក់ ? ឬក៏ចាញ់ទាំងពីរនាក់ ? ដ្បិតអ្នកទាំងពីរជាមនុស្សមានឥទ្ធិពលនៅក្នុងសង្គមសម័យ“សម្ដេចតេជោសែន” ដូចគ្នា ។
លោក ទូច គង្គា ជានាយកគ្រប់គ្រងកាសែតនគរវត្ដផង និងជាមន្ដ្រីអាវុធហត្ថ មានបក្ខពួកសែស្រឡាយខាងទាហានផង ព្រមទាំងជាអ្នកមានលុយកាក់ផង រីឯលោក សយ សុភាព ជានាយកគ្រប់គ្រងកាសែតដើមអម្ពិលផង និងជាមនុស្សដែលសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ផ្ដល់ចំហាយអំណាចឬឥទ្ធិពលឱ្យផង ព្រមទាំងជាអ្នកមានលុយកាក់ផង ។ ដូច្នេះ អ្នកទាំងពីរដែលធ្លាប់ល្អូកល្អឺនចែកផលប្រយោជន៍គ្នាពីអតីតកាលនោះ សុទ្ធតែជាគីឡូអ្នកខ្លាំង ឬជាអ្នកមានឥទ្ធិពលដូចគ្នា ដែលអាចធ្វើឱ្យស្ថាប័នតុលាការកម្ពុជាសម្រេចសេចក្ដីដោយការប្រុងប្រយ័ត្នបំផុត ។
យើងចាំមើលទាំងអស់គ្នា ! តើតុលាការសម័យ“សម្ដេចតេជោសែន”នឹងកាត់ក្ដីឱ្យចេញជាលទ្ធផលបែបណាទៅលើមនុស្សខ្លាំងនាសម័យ“សម្ដេចតេជោសែន” ទាំងពីរនាក់ដូចលោក សយ សុភាព និងលោក ទូច គង្គា នេះ? ៕
ប្រភពពីដើមត្នោត
