ភ្នំពេញ: លោក អ៊ឹម សួស្តី ប្រធានគណៈកម្មាធិការជាតិរៀបចំការបោះឆ្នោត គ.ជ.ប. បានមានប្រសាសន៍ថា អ្វីដែលគ.ជ.ប បានធ្វើគឺអនុវត្តទៅតាមច្បាប់ ដែលនៅជាធរមាន គឺច្បាប់បោះឆ្នោតជ្រើសតាំងតំណាងរាស្ត្រ។ ការដែលចង់បង្កើតគណៈកម្មការ ដែលមានគណបក្ស អង្គការក្រៅរដ្ឋាភិបាល និងអង្គការសហប្រជាជាតិ គឺវាហួសសមត្ថកិច្ចរបស់គ.ជ.បហើយ។ ដោយលោកបានលើកឡើងថា ដំណើរចេះតែទៅមុខហើយ។
លោក អ៊ឹម សួស្តី បានបញ្ជាក់ថា ទាក់ទងការបដិសេធ មិនទទួលស្គាល់លទ្ធផលបោះឆ្នោតរបស់គណបក្សសង្គ្រោះជាតិ គឺលោកមិនអាចវាយតម្លៃថា យ៉ាងម៉េចទេ។ ចាំគ.ជ.ប ធ្វើរហូតដល់ប្រកាសលទ្ធផលប់ឆ្នោតជាផ្លូវការ មុនដំបូងលទ្ធផលបណ្តោះអាសន្ន ហើយបើអត់មានបណ្តឹងទេនិងប្រកាសជាផ្លូវការ។
ចំណែកលោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន និងជាអ្នកនាំពាក្យរដ្ឋសភា បានមានប្រសាសន៍ថា គណបក្សសង្គ្រោះជាតិ មិនទទួលស្គាល់លទ្ធផលនៃការបោះឆ្នោតបានន័យថា “គាត់មិនទទួលស្គាល់សន្លឹកឆ្នោត ដែលគាត់ទទួលបានពិប្រជាពលរដ្ឋដែលបោះឆ្នោតឲ្យគាត់ និងធ្វើឲ្យប្រជាពលរដ្ឋដែលគាំទ្រគាត់អស់ជំនឿ”។
លោកបានលើកឡើងថា បើសិនជាមានភាពមិនប្រក្រតីត្រង់ណា ប្តឹងឡើងមករហូលដល់គ.ជ.ប ហើយគ.ជ.ប ត្រូវដោះស្រាយ ហើយបើការដោះស្រាយតម្រូវឲ្យប្តឹងចិត្តរបស់ភាគីណាមួយទេ ភាគីនោះអាចប្តឹងបន្តទៅក្រុមប្រឹក្សាធម្មនុញ្ញ ហើយក្រុមប្រឹក្សាធម្មនុញ្ញវិនិច្ឆ័យ និងបិទផ្លូវតវ៉ា។ យន្តការមានរួចហើយ គ្មានអ្វីទាមទារបង្កើតស្អីខុសច្បាប់បានទេ។
មេដឹកនាំគណបក្សសង្គ្រោះជាតិ បានប្រកាសមិនបដិសេធមិនទទួលស្គាល់លទ្ធផល នៃការបោះឆ្នោតជ្រើសតាំងតំណាងរាស្ត្រ ( លទ្ធផលបណ្តោះអាសន្ន ) ដែលចេញដោយគណៈកម្មាធិការជាតិរៀបចំការបោះឆ្នោត គ.ជ.ប. និងដោយគណបក្ស ប្រជាជនកម្ពុជា និងបានទាមទារឲ្យបង្កើតគណៈកម្មការស៊ើបអង្កេតចម្រុះ ដើម្បីស្រាវជ្រាវនូវភាពមិនប្រក្រតី។
ការបដិសេធមិនទទួលស្គាល់លទ្ធផល នៃការបោះឆ្នោត ត្រូវបានគណបក្សប្រឆាំងអះអាងថា ដោយសារតែមានភាពមិនប្រក្រតីជាច្រើន បានកើតឡើង ដែលនាំឲ្យប៉ះពាល់ដល់លទ្ធផលនៃការបោះឆ្នោត។
ការប្រកាសបដិសេធនេះ បានធ្វើឡើងនៅក្នុងសន្និសីទកាសែត កាលពីព្រឹកថ្ងៃទី២៩ ខែកក្កដា ឆ្នាំ២០១៣ ដោយលោក សម រង្ស៊ី ប្រធានគណបក្ស និងលោក កឹម សុខា អនុប្រធានគណបក្សសង្គ្រោះជាតិ។
លោក សម រង្ស៊ី បានថ្លែងថា ការធ្វើសន្និសីទនេះ ដើម្បីបញ្ជាក់អំពីគោលជំហទាក់ទងទៅនឹងលទ្ធផលនៃការបោះឆ្នោត ហើយលទ្ធផល ដែលប្រកាសដោយគណបក្សនយោបាយមួយ ហើយដែលមានមូលដ្ឋានតួលេខទាក់ទងទៅអ្វី ដែលគ.ជ.ប បានផ្សព្វផ្សាយដែរ គណបក្ស សង្គ្រោះជាតិ សូមបដិសេធ និងមិនអាចទទួលយកបានទេចំពោះលទ្ធផលនេះ។
គណបក្សសង្គ្រោះជាតិ ក៏បានទាមទារឲ្យមានការបង្កើតគណៈកម្មការស៊ើបអង្កេតចម្រុះ ដែលមានការចូលរួមពីគណបក្សប្រជាជនកម្ពុជា គណបក្សសង្គ្រោះជាតិ និងអង្គការក្រៅរដ្ឋាភិបាល ដើម្បីស្រាវជ្រាវនូវភាពមិនប្រក្រតីជាច្រើន ដែលនាំមកនូវផលប៉ះពាល់លទ្ធផលនៃការបោះឆ្នោត។
លោកបានបញ្ជាក់ថា “ចាប់ពីពេលនេះ តទៅ ការដឹកនាំប្រទេសគ្រប់វិស័យ ការធ្វើសេចក្តីសម្រេចទាក់ទងទៅនឹងអនាគតប្រទេសជាតិ គឺត្រូវតែមានការចូលរួមពីគណបក្ស សង្គ្រោះជាតិ ពីព្រោះគ្មានគណបក្សណា គ្មានមេដឹកនាំណា ចាប់ពីពេលនេះតទៅ អាចធ្វើអ្វីតាមចិត្តដូចមុនទៀត ដោយមិនមានការយល់ព្រមពីគណបក្ស សង្គ្រោះជាតិ”។
ទាក់ទងទៅនិងសំនួររបស់អ្នកកាសែតដែលបានសួរថា តើការបដិសេធមិនទទួលស្គាល់លទ្ធផលនៃការបោះឆ្នោត វាស្មើនិងការបោះបង់ចោលអាសនៈដែលគណបក្សសង្គ្រោះជាតិ ទទួលបានដែរឬទេ?
សំណួរនេះ ត្រូវបានលោក កឹម សុខា អនុប្រធានគណបក្សសង្គ្រោះជាតិ បានឆ្លើយថា គណបក្សសង្គ្រោះជាតិ អត់បោះបង់ចោលអាសនៈទេ ប៉ុន្តែគណបក្សសង្គ្រោះជាតិ ប្រកាសមិនទទួលស្គាល់លទ្ធផលបោះឆ្នោត មិនមែនប្រកាសបោះបង់ចោលអាសនៈទេ។
លោក កឹម សុខា បានបញ្ជាក់ថា “ច្បាប់ កាលណាយើងប្រកាសបោះបង់ចោល អានឹងបានគេយកទៅធ្វើអីទៀត បើយើងអត់ប្រកាសបោះបង់ចោលទេ គឺជារបស់យើង ប៉ុន្តែយើងប្រកាសមិនទទួលស្គាល់អ្វីដែលខុស”។
សូមជម្រាបថា លទ្ធផលបោះឆ្នោតផ្លូវការ នៃការបោះឆ្នោតនៅមិនទាន់ប្រកាសជាផ្លូវការនៅឡើយទេ។ ប៉ុន្តែបើតាមលទ្ធផលបណ្តោះអាសន្ន ដែលបានផ្សព្វផ្សាយចេញពីគណបក្សប្រជាជនកម្ពុជា គឺគណបក្សប្រជាជនកម្ពុជា ទទួលបាន ៦៨ អាសនៈ និងគណបក្សសង្គ្រោះជាតិ ទទួលបាន ៥៥ អាសនៈ ក្នុងចំណោមអាសនៈរដ្ឋសភាសរុប ១២៣៕
ប្រភពពី CEN
0 comments:
Post a Comment