ភ្នំពេញៈ រដ្ឋសភានឹងអនុម័តច្បាប់ថ្មី ស្តីពីការផ្តន្ទាទោសប្រឆាំងនឹងបុគ្គលណា ដែលនិយាយថា គ្មានរបបប្រល័យពូជសាសន៍នៅកម្ពុជា នៅថ្ងៃសុក្រសប្តាហ៍នេះ បន្ទាប់ពីមានការស្នើឲ្យបង្កើតច្បាប់នេះពីសំណាក់លោកនាយករដ្ឋមន្រ្តីហ៊ុន សែន កាលពីសប្តាហ៍មុន។
ក្រោយកិច្ចប្រជុំ រវាងប្រធានគណៈកម្មការជំនាញទាំងអស់នៃរដ្ឋសភា និងមេដឹកនាំនៃស្ថាប័ននេះកាលពីថ្ងៃសុក្រសប្តាហ៍មុន លោក ឈាង វុន តំណាងរាស្រ្តគណបក្សប្រជាជនកម្ពុជា និងជាអ្នកនាំពាក្យរដ្ឋសភាបានផ្តល់បទសម្ភាស ដល់កាសែតភ្នំពេញ ប៉ុស្តិ៍ ទាក់ទងនឹងសំណើនៃការធ្វើច្បាប់នេះ។ លោកបានថ្លែងថា ច្បាប់នេះមាន៥មាត្រាហើយគោលបំណងនៃការធ្វើច្បាប់នេះគឺដើម្បីផ្តន្ទាទោសជនណាក៏ដោយដែលថា គ្មានរបបប្រល័យពូជសាសន៍នៅកម្ពុជា។
ប៉ុន្តែ លោក ឈាង វុន បានបញ្ជាក់ថា ច្បាប់នេះ មិនអាចមានប្រតិសកម្មបានទេ មានន័យថា ប្រសិនបើជនណាម្នាក់ និយាយថា ខ្មែរក្រហមមិនបានសម្លាប់ប្រជាជន ឬថា គ្មានអំពើប្រល័យពូជសាសន៍នៅកម្ពុជានៅមុនការធ្វើច្បាប់នេះ បុគ្គលនោះនឹងមិនត្រូវរងការផ្តន្ទាទោសទេ។
ចំពោះករណីរបស់ លោក កឹម សុខា ប្រធានស្តីទីនៃគណបក្សសង្គ្រោះជាតិ ដែលត្រូវបានចោទថា បាននិយាយថា គុកទួលស្លែង ជាគុកសិប្បនិម្មិត ឬត្រូវបានគេរៀបចំឡើងនោះ លោក ឈាង វុន បានគូសបញ្ជាក់ថា ច្បាប់នេះមិនអាចផ្តន្ទាទោសលោក កឹម សុខា បានទេ ប៉ុន្តែ លោក កឹម សុខា នៅតែទទួលរងការថ្កោលទោសពីប្រជាជនដដែល។
ខាងក្រោមនេះគឺជាការបកស្រាយរបស់លោក ឈាង វុន អំពីសេចក្តីស្នើច្បាប់នេះ។
របៀបធ្វើច្បាប់ដើម្បីទប់ស្កាត់ពីការមិនទទួលស្គាល់ខ្មែរក្រហម ដែលនិយាយថា គ្មានការពិត បំភ្លៃប្រវតិ្តសាស្រ្ត។ ច្បាប់អាចធ្វើជាពីរប្រភេទ ទី១ គឺច្បាប់ដែលគោរពគោលការណ៍ទូទៅនៃច្បាប់។គោលការណ៍ទូទៅនៃច្បាប់គឺច្បាប់សកល គោលការណ៍ដែលច្បាប់ពុំមានប្រតិសកម្ម។ គោលការណ៍នេះគឺជាគោលការណ៍ទូទៅ នៃច្បាប់ទាំងអស់ត្រូវតែធ្វើបែបនេះ មានន័យថា យើងធ្វើច្បាប់ថ្ងៃនេះ មិនអាចយកមកអនុវត្តប្រឆាំងទង្វើពីពេលមុនបានទេ អនុវត្តតែចំពោះសកម្មភាពនៅថ្ងៃអនាគតប៉ុណ្ណោះ។ គណៈកម្មាធិការអចិន្រៃ្តយ៍រដ្ឋសភា បានសម្រេចធ្វើច្បាប់ទូទៅសម្រាប់ថ្ងៃអនាគត។ យើងបានពិភាក្សាថាតើច្បាប់នេះ អាចធ្វើដូចច្បាប់ដទៃទៀតដែលអាចមានប្រតិសកម្ម ឬអត់? ព្រោះយើងមានសមត្ថភាពធ្វើច្បាប់ ប្រសិនបើយើងពិចារណាថា បញ្ហានេះជាបញ្ហាធ្ងន់ធ្ងរអាចសម្លាប់ប្រទេសជាតិ។ ច្បាប់ដែលយើងធ្វើនេះ មានប្រទេសប្រហែល១៧ ទៅ១៩ បានធ្វើរួចហើយ។ យើងបានសិក្សារួចហើយថា តើប្រទេសណាដែលមានបញ្ហានេះកើតឡើងប៉ុន្តែមានច្បាប់នេះឬអត់? ដូច្នេះ ប្រទេសដែលមានបញ្ហានេះដូចយើងរឹតតែមានច្បាប់ផ្សេងៗ សម្រាប់ប្រទេសរបស់គេប៉ុន្តែច្បាប់ផ្សេងៗត្រូវតែអនុវត្តតាមខ្លឹមសារនៃអនុសញ្ញា ឬសន្ធិសញ្ញាដទៃទៀតដែលប្រទេសបានចុះហត្ថលេខាទាក់ទងនឹងអំពើប្រល័យពូជសាសន៍…ដូច្នេះ អ្វីដែលយើងសរសេរ ទី១ យើងត្រូវតែអនុវត្តតាមខ្លឹមសារជាសកល។ ទី២ យើងត្រូវតែផ្សារភ្ជាប់នឹងបញ្ហាពិតប្រាកដនៅកម្ពុជា។ ហេតុដូច្នេះហើយ យើងធ្វើ ៥ មាត្រា។ ទី ១ ច្បាប់នេះកំណត់ថា ជនណាដែលមិនទទួលស្គាល់ថា មានអំពើប្រល័យពូជសាសន៍នៅកម្ពុជា… ផ្សារភ្ជាប់បញ្ហានេះនឹងករណីព្រហ្មទណ្ឌនេះជាមាត្រា១ ហើយកំណត់រយៈពេលច្បាស់លាស់ក្នុងរបបកម្ពុជាប្រជាធិបតេយ្យ មានន័យថា ជនណាក៏ដោយ ដែលមិនទទួលស្គាល់ការសម្លាប់ក្នុងរបបកម្ពុជាប្រជាធិបតេយ្យត្រូវតែមានទោស។
មាត្រា ២ ចែងថា សូម្បីបុគ្គលណាមួយ ដែលមិនមានការទទួលស្គាល់ជួយនិយាយសម្រាល ឬបដិសេធចំពោះការមានអំពើប្រល័យពូជសាសន៍ នឹងត្រូវមានទោស។ យើងមិនចង់ចោទប្រកាន់លោក កឹម សុខា ដែលនិយាយថា គុកទួលស្លែងគឺសិប្បនិម្មិតទេ នេះត្រូវតែមានទោសប្រសិនបើច្បាប់នេះ មានមុនពេលលោកនិយាយបែបនេះ។ មាត្រា ២ បានកំណត់ទោសពន្ធនាគារពី ៦ខែ ដល់ ២ឆ្នាំ និងពិន័យជាប្រាក់ពី១លានដល់៤លានរៀល។ សំណើច្បាប់នេះ គណៈកម្មាធិការអចិន្ត្រៃយ៍ បានសម្រេចមិនតម្រង់លើតែលោក កឹម សុខា ម្នាក់ទេគឺថា យើងធ្វើច្បាប់នេះ សម្រាប់ប្រទេសទាំងមូលចាប់ពីថ្ងៃនេះដល់ថ្ងៃអនាគត។ ដូច្នេះ ប្រសិនបើលោក កឹម សុខា មិននិយាយអ្វីទៀតទេ លោកនឹងគ្មានទោសទេ ប៉ុន្តែ ប្រសិនបើគាត់និយាយទៀតគាត់នឹងមានទោសច្បាប់នេះនឹងយកទៅអនុវត្ត។ ច្បាប់នេះមិនពិបាកទេ បើទោះបីជាគណបក្សប្រឆាំងមិនគាំទ្រក៏ដោយ ក៏អាចចេញបានដែរព្រោះយើងមាន៩០ កៅអី។
អ្នកខ្លះយល់ថា ការចេញច្បាប់នេះអាចកំហិតសេរីភាពបញ្ចេញមតិតើឯកឧត្តមគិតយ៉ាងដូចម្តេច?
ច្បាប់នេះ មិនមែនតែនៅកម្ពុជាទេ ក្នុងប្រទេសជឿនលឿនក៏មានច្បាប់នេះដែរ។ សេរីភាពបញ្ចេញមតិត្រូវបានកំណត់ក្នុងច្បាប់នេះ សូមមើលច្បាប់រដ្ឋធម្មនុញ្ញយើង។ សេរីភាពនៃការបញ្ចេញមតិ មិនត្រូវប៉ះពាល់ដល់សិទិ្ធអ្នកដទៃទេ។ អ្នកដែលចោទថា ច្បាប់នេះគឺដើម្បីកំហិតសេរីភាពនៃការបញ្ចេញមតិ គឺគាត់កំពុងគិតខុស។ វាមិនមានន័យថា យើងមានសិទិ្ធបញ្ចេញមតិ យើងអាចបញ្ចេញមតិស្រេចតែចិត្តយើងនោះទេ មិនបានទេ។
ចុះច្បាប់ថ្មីមួយទៀត ដែលស្នើដោយគណបក្សប្រឆាំងសូមឲ្យផ្តន្ទាទោសជនណាដែលនិយាយថានឹងមានសង្គ្រាម ប្រសិនបើខ្លួនចាញ់ឆ្នោត ហើយហាមឃាត់បុគ្គលដែលមានតំណែងក្នុងរបបខ្មែរក្រហម កុំឲ្យកាន់តំណែងកំពូលរបស់រដ្ឋ តើច្បាប់នេះអាចចេញឬអត់?
អ្វីៗដែលគាត់បានលើកឡើងគឺដើម្បីកេងចំណេញប្រយោជន៍នយោបាយ។
វាមិនមានការពិតទេ។ អ្នករំដោះប្រទេសជាតិយើងក្នុងឆ្នាំ ១៩៧៩ គឺជាមេដឹកនាំនៃគណបក្សយើងសព្វថ្ងៃនេះ។ ដូច្នេះ យើងក្រឡេកមើលឲ្យច្បាស់ទៅ មេដឹកនាំគណបក្សប្រជាជនកម្ពុជាបានរំដោះប្រទេសជាតិ នៅថ្ងៃទី២ខែធ្នូ ដោយបង្កើតនូវគោលការណ៍កងទ័ព និងគោលការណ៍អ្វីៗទាំងអស់ដើម្បីរំដោះប្រទេសជាតិដោយមានការជ្រោមជ្រែងពីវៀតណាម។ យើងមិនដែលនិយាយថា គ្មានវៀតណាមទេ គឺមានការជួយជ្រោមជ្រែងពីវៀតណាម ពីព្រោះយើងកំពុងទឹកចូលច្រមុះទោះបីឈើពុកក៏យើងត្រូវតែតោងដែរ។ ដូច្នេះ ខ្ញុំចង់និយាយថា យើងទាំងអស់គ្នាមានជីវិតរស់ឡើងវិញសព្វថ្ងៃនេះ ដោយសារតែថ្ងៃ ២ ធ្នូ និងថ្ងៃ ៧ មករា។ នេះវាសំខាន់ណាស់ យើងត្រូវតែទទួលស្គាល់ការពិត។ ហេតុអ្វីបានជាគេបង្កើតសាលាក្តីខ្មែរក្រហម? ពីព្រោះពួកគេចង់បញ្ចប់រឿងប្រល័យពូជសាសន៍ ហើយការបញ្ចប់ត្រូវតែមានអ្នកទទួលខុសត្រូវ។ ប្រសិនបើមេដឹកនាំនៃគណបក្សប្រជាជនយើងត្រូវបានចោទប្រកាន់ពីបទទទួលខុសត្រូវអង្គការសហប្រជាជាតិគេមិនចាំបាច់មកទទួលស្គាល់យើងទេ។
ដូច្នេះ តើច្បាប់នេះ នឹងអាចយកមកពិភាក្សា ឬអត់?
អ៊ីចឹង អ្វីដែលគាត់និយាយគឺមិនពិត។ វាជាការចោទប្រកាន់ វាមិនត្រឹមត្រូវទេ ហើយប្រសិនបើគាត់[ កឹម សុខា] ស្នើ គាត់មិនមានសិទិ្ធដើម្បីស្នើទេ ពីព្រោះគាត់មិនមែនជាតំណាងរាស្រ្តទៀតទេ។គាត់បានបាត់បង់សមាជិកភាពគណបក្សគាត់ដោយសារតែគាត់បានទៅចូលរួមជាមួយគណបក្សសង្គ្រោះជាតិ។ គាត់លែងជាតំណាងរាស្រ្តទៀតហើយ។ ការធ្វើច្បាប់មានពីរប្រភេទ ទី១ គឺសេចក្តីព្រាងច្បាប់ ដែលស្នើដោយរាជរដ្ឋាភិបាល និងទី២ សេចក្តីស្នើច្បាប់ដែលស្នើដោយសមាជិករដ្ឋសភា៕ TK
________________
មាស សុខជា
ភ្នំពេញ ប៉ុស្តិ៍
ភ្នំពេញ ប៉ុស្តិ៍
0 comments:
Post a Comment