ពលរដ្ឋដែលកំពុងមានវិបត្តិដីធ្លីជាមួយអាជ្ញាធរនៅសង្កាត់បឹងកក់១ ខណ្ឌទួលគោក រាជធានីភ្នំពេញ និងក្រុមហ៊ុន ឃុន សៀ ត្រូវជនមិនស្គាល់មុខចំនួនពីរនាក់ បានលួចកាប់បីពូថៅត្រង់បោះដៃផុតផ្នែកខាងក្រោយ ឬឆ្អឹងខ្នង។
ជនរងគ្រោះ បានឲ្យដឹងថា ហេតុការណ៍នេះកើតឡើងនៅក្នុងភូមិ កាលពីថ្ងៃទី៣ មិថុនា កន្លងទៅ ហើយគេសន្និដ្ឋានថា នេះជាការគំរាមកំហែងមួយ កុំឲ្យមានការតវ៉ាចំពោះការបណ្ដេញពលរដ្ឋចេញពីតំបន់នោះ។ ចំណែកសមត្ថកិច្ចនគរបាលនៅសង្កាត់ អះអាងថា កំពុងធ្វើការស្រាវជ្រាវចំពោះករណីបង្ករបួសស្នាមនេះ។
ជនរងគ្រោះ កញ្ញា លី សៀវមិញ និស្សិតឆ្នាំទី៤ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងជាតំណាងពលរដ្ឋដែលមានបញ្ហាដីធ្លីនៅសង្កាត់បឹងកក់១ ខណ្ឌទួលគោក រាជធានីភ្នំពេញ បានដាក់ពាក្យប្ដឹងទៅអាជ្ញាធរ និងស្ថាប័នពាក់ព័ន្ធ ឲ្យស្វែងរកយុត្តិធម៌ ព្រមទាំងចាប់ជនដៃដល់មកផ្ដន្ទាទោស ចំពោះការប៉ុនប៉ងធ្វើឲ្យរូបនាងមានរបួសនោះ។
កញ្ញា លី សៀវមិញ ឲ្យដឹងថា បន្ទាប់ពីកញ្ញាជិះម៉ូតូចេញពីផ្ទះបានចម្ងាយប្រមាណ ១០០ម៉ែត្រ ស្រាប់តែមានជនមិនស្គាល់មុខពីរនាក់ បានទាញពូថៅកាប់កញ្ញាបីពូថៅ ត្រូវចំត្រង់បោះដៃផុតពីខាងក្រោយ (នៅម៉ោងប្រមាណ ៥កន្លះ)។ កញ្ញាមានប្រសាសន៍ថា កញ្ញាមិនដែលមានគំនុំជាមួយអ្នកភូមិរបងជាមួយឡើង។ ដូច្នេះ រឿងរ៉ាវនៃជនល្មើសដែលកាប់កញ្ញានោះ កញ្ញាសង្ស័យរឿងនេះពាក់ព័ន្ធនឹងបញ្ហាជម្លោះដីធ្លី។
ទាក់ទងនឹងរឿងរ៉ាវនេះ កញ្ញាជូនដំណឹងដល់នគរបាលសង្កាត់បឹងកក់១ និងចៅសង្កាត់រួចរាល់ហើយ។ ទោះយ៉ាងណា កញ្ញាបញ្ជាក់ថា រឿងរ៉ាវនេះហាក់សង្ឃឹមតិចតួចចំពោះការស្វែងរកជនល្មើសឃើញ ដោយកញ្ញាសង្កត់ធ្ងន់ថា បើសិនបញ្ហានេះពាក់ព័ន្ធនឹងបញ្ហាដីធ្លី។
ឆ្លើយតបនឹងបញ្ហានេះ ប្រធានប៉ុស្តិ៍នគរបាលនៅសង្កាត់បឹងកក់១ លោក ហម គា ប្រតិកម្មតបនឹងការលើកឡើងរបស់កញ្ញា លី សៀវមិញ ថា ក្នុងនាមតួនាទីរបស់លោកដែលត្រូវគេឲ្យធ្វើការងារ ដើម្បីរក្សាសុវត្ថិភាព និងការពារសេចក្ដីសុខជូនពលរដ្ឋ លោកនឹងខិតខំធ្វើការងារនេះឲ្យអស់លទ្ធភាព។
ការគំរាមនេះ កើតនៅចំពេលដែលពលរដ្ឋដែលបដិសេធពុំព្រមចាកចេញពីលំនៅឋាន និងដីរបស់ខ្លួន តាមសំណើរបស់ក្រុមហ៊ុន ឃុន សៀ អភិវឌ្ឍន៍ ដែលទិញដីតំបន់នោះ។ ក្នុងហេតុការណ៍នោះ ពលរដ្ឋចំនួនបីគ្រួសារក្នុងចំណោម ៧គ្រួសារក្នុងភូមិ ត្រូវក្មេងៗប្រមាណ ១០នាក់ចូលទៅធ្វើទុក្ខបុកម្នេញ និងវាយកម្ទេចសម្ភារៈនានាថែមទៀត។ ករណីនេះ កញ្ញា លី សៀវមិញ បានប្ដឹងទៅអាជ្ញាធរ កាលពីថ្ងៃទី៣១ ខែឧសភា ឆ្នាំ២០១៣។
កញ្ញា លី សៀវមិញ បញ្ជាក់បន្ថែមថា ករណីនេះកញ្ញាបានថតរូបនៃសកម្មភាពក្មេងៗទាំងនោះ និងយករូបភាពនោះបង្ហាញអាជ្ញាធរមូលដ្ឋានថែមទៀត ប៉ុន្តែអាជ្ញាធរហាក់ពុំអើពើនឹងបញ្ហានេះឡើយ។ ស្របគ្នានេះ កញ្ញាហាក់មានទំនុកចិត្តតិចតួចចំពោះរឿងរ៉ាវដែលជនមិនស្គាល់មុខបានប្រើពូថៅកាប់គំរាមកញ្ញានោះ៕
ដោយ វិជ័យ អានន្ទ
0 comments:
Post a Comment