លោកប្តីទ្រាំមិនបានដុតរថយន្តកាមរីបាឡែនមួយគ្រឿងឆេះខ្ទេច

6:02 PM

ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើងក្នុងខណៈ ដែលប្តីប្រពន្ធមួយគូរ រួមដំណើរជាមួយគ្នា នៅក្នុងរថយន្តកាមរីបាឡែន ហើយទាស់ពាក្យសម្តី នឹងប្រកែកគ្នា យ៉ាងខ្លាំង រហូតធ្វើឲ្យភាគីទាំងពីរ ទ្រាំមិនបានចុះពីលើរថយន្ត នឹងបង្កឲ្យលោកប្តីចិត្តខ្លាំងខឹងសម្ប៉ានឹងប្រពន្ធខ្លាំងពេកទ្រាំមិនបានសម្រេចចិត្តដុតរថយន្តកាមរីបាឡែន របស់គេ បណ្តាលឲ្យអណ្តាតភ្លើងឆាបឆេះយ៉ាងសន្ធោសន្ធៅខ្ទេចទាំងស្រុងតែម្តង កាលពីវេលាម៉ោង ១២ នឹង ៥០ នាទី រំលងអាធ្រាត្រ ឈានចូលថ្ងៃទី០៥ ខែមិថុនាឆ្នាំ ២០១៣ ស្ថិតនៅតាមបណ្តោយផ្លូវលេខ ៥៩៨ ទល់មុខស្នងការនគរបាលរាជធានីភ្នំពេញ ក្នុងសង្កាត់ច្រាំងចំរះ ២ ខណ្ឌឬស្សីកែវ ។

ជុំវិញហេតុការណ៍ភ្ញាក់ផ្អើលខាងលើនេះបានឲ្យដឹងថាមុនពេលកើតហេតុគេបានឃើញប្តីប្រពន្ធ មួយគូរ វ័យប្រហែលជាង ៣០ ឆ្នាំបានជិះរួមដំណើរជាមួយគ្នា ក្នុងរថយន្តកាមរីបាឡែន មួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2K 6141 ធ្វើដំណើរតាមបណ្តោយផ្លូវ ៥៩៨ ក្នុងទិសដៅពីត្បូងទៅជើង លុះពេលជិះដល់ចំណុចកើតហេតុស្រាប់តែប្តីប្រពន្ធខាងលើនេះបានចុះពីលើរថយន្តរបស់ពួកគេ នឹងបានទាស់ពាក្យសម្តី ប្រតាយប្រតប់គ្នា យ៉ាងខ្លាំងនៅខាងក្រៅរថយន្ត រហូតធ្វើឲ្យលោកប្តីផ្ទុះកំហឹងទ្រាំមិនបាន កើតចិត្តខ្លាំង សម្រេចចិត្តដុតរថយន្តកាមរីបាឡែននោះបង្កឲ្យឆាបឆេះសន្ធោសន្ធៅខ្ទេចម៉ដ្ឋទាំងស្រុងតែម្តង ។

បន្ទាប់ពីកើតហេតុប្តីប្រពន្ធខាងលើនេះត្រូវបានសមត្ថកិច្ចនាំខ្លួនចូលទៅក្នុងស្នងការនគរបាល រាជធានីភ្នំពេញដើម្បីធ្វើការសាកសួរពីបញ្ហាដែលពួកគេឈ្លោះប្រកែកគ្នារហូតឈានដល់ការដុតបំផ្លាញទ្រព្យសម្បតិ្តរួមរបស់ពួកគេបែបនេះ ។ សមត្ថកិច្ចនៅមិនទាន់អាចបញ្ជក់ថាករណីខាងលើនេះបង្កឡើងដោយសារប្រពន្ធខ្លាំងធ្វើឲ្យប្តីខឹង ឬក៏ប្តីចិត្តខ្លាំងចង់ឈ្នះប្រពន្ធ ទើបសម្រេចដុតឡានចោលយ៉ាងនេះ។
គួរបញ្ជាក់ហេតុការណ៍ខាងលើនេះត្រូវបានសមត្ថកិច្ចប្រើប្រាស់រថយន្តពន្លត់អគ្គីភ័យអស់ចំនួន១ គ្រឿង ក្នុងការបាញ់អណ្តាតភ្លើងដែលកំពុងឆាបឆេះរថយន្ត ប៉ុន្តែរថយន្តខាងលើនេះត្រូវភ្លើងឆេះម៉ដ្ឋទាំងស្រុងទៅហើយ៕ ជោគជ័យ