ស្វាយរៀងៈ តុលាការខេត្តស្វាយរៀងបានប្រកាសសាលក្រមផ្ទន្ទាទោសលោក ឈូក បណ្ឌិត អតីតអភិបាលក្រុងបាវិតដ៏មានឥទ្ធិពល ឲ្យជាប់ពន្ធនាគារចំនួន ១ឆ្នាំ ៦ខែ និងត្រូវសងជាសំណងដល់ជនរងគ្រោះ កម្មការិនីទាំងបីនាក់សរុបចំនួន ៣៨ លានរៀល។ រីឯ លោក ស ចន្ថា នាយផ្នែកព្រហ្មទណ្ឌ នគរបាលក្រុងបាវិតត្រូវបានតុលាការលើកបទចោទ ប៉ុន្តែពិន័យ ៦លានរៀលពីបទប្រើប្រាស់អាវុធខុសច្បាប់។
សាលក្រមដែលត្រូវបានប្រកាសជាសាធារណៈនៅព្រឹកថ្ងៃអង្គារនេះ មិនមានវត្តមានលោក ឈូក បណ្ឌិត ដែលជាជនជាប់ចោទនោះទេ រួមទាំងពេលសវនាការដែលបានធ្វើឡើងអស់រយៈពេលបីថ្ងៃ ចាប់តាំងពីថ្ងៃទី១២ដល់ថ្ងៃទី១៤ ខែមិថុនាកន្លងមក។
សាលក្រមនេះនឹងត្រូវអនុវត្តចាប់ពីពេលប្រកាសនេះតទៅ ដោយសារតែលោក ឈូក បណ្ឌិត មិនដែលត្រូវបានចាប់ខ្លួនទេ បើទោះបីជាលោក ស ខេង រដ្ឋមន្ត្រីក្រសួងមហាផ្ទៃ ធ្លាប់បានថ្លែងថា អតីតអភិបាលក្រុងបាវិតរូបនេះ គឺជាជនសង្ស័យតែម្នាក់គត់ ដែលបានបាញ់កម្មករឲ្យរងរបួសនៅក្នុងការតវ៉ាមួយនៅក្រុងបាវិត កាលពីដើមឆ្នាំ ២០១២ ក្តី។
ចុចមើលបន្ត http://www.postkhmer.com/
