រថយន្តកុងគឺន័របើកកិនម៉ូតូសេ១២៥ ហើយជ្រុលធ្លាក់ប្រឡាយរបួសធ្ងន់ម្នាក់

4:43 PM

ភ្នំពេញ ៖ បុរសម្នាក់ត្រូវរងរបួសធ្ងន់ធ្ងរ ក្នុងខណៈកំពុងជិះម៉ូតូមួយគ្រឿងម៉ាកសេ ១២៥ ហើយត្រូវរថយន្ត កុងគឺន័របើកបុកពីក្រោយពេញទំហឹង នឹងកិនម៉ូតូអូសជាច្រើនម៉ែត្រ ប៉ុន្តែរថយន្តនៅមិនទាន់អស់ល្បឿន លឿនបានជ្រុលធ្លាក់រថយន្តកុងគឺន័រក្នុងប្រឡាយជិតចំណុចកើតហេតុទើបបណ្តាលឲ្យរថយន្តបន្តដំណើរលែងរួច ។ គ្រោះថ្នាក់នេះកើតឡើងកាលពីវេលាម៉ោង ២១ នឹង ១០ នាទីយប់ថ្ងៃទី ០២ ខែមិថុនា ឆ្នាំ២០១៣ នៅតាមបណ្តោយផ្លូវជាតិលេខ ៤ ទល់មុខទីស្នាកការសង្កាត់ចោមចៅ ក្នុងសង្កាត់ចោមចៅ ខណ្ឌពោធិ៍សែនជ័យ ។
យោងតាមសេចក្តីរាយការណ៍ពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកសេ ១២៥ ពណ៌ខ្មៅ ពាក់ស្លាកលេខភ្នំពេញ 1BU 2634 ធ្វើដំណើរតាមបណ្តោយផ្លូវជាតិលេខ ៤ ក្នុងទិសដៅពីកើតទៅលិច លុះជិះដល់ចំណុចកើតហេតុក៏ត្រូវរថយន្តកុងគឺន័រ នមួយគ្រឿង ម៉ាកនីសាន់ ពណ៌ប្រផេះ ពាក់ស្លាកលេខ ភ្នំពេញ3A 1669 ដែលកំពុងបើកពីក្រោយបានជ្រុលទៅបុកម៉ូតូពេញទំហឹងតែម្តង ហើយរថយន្តបានកិនម៉ូតូនឹងអូសម៉ូតូក្រោមរថយន្តជាច្រើនម៉ែត្រ។ ប្រភពដដែលបានបន្តថា នៅហេតុការណ៍នេះរថយន្តកុងគឺន័រនៅមិនទាន់អស់ល្បឿនបានជ្រុលធ្លាក់ក្បាលរថយន្តក្នុងប្រឡាយជិតចំណុចកើតហេតុទើបបន្តដំណើរទៅមុខលែង ។ ប៉ុន្តែក្នុងគ្រោះថ្នាក់នេះបណ្តាលឲ្យបុរសម្នាក់ជាម្ចាស់ម៉ូតូត្រូវរងរបួសធ្ងន់ធ្ងរ ។
បន្ទាប់ពីកើតហេតុរថយន្តបង្កហេតុ នឹងម៉ូតូរបស់ជនរងគ្រោះត្រូវបានសមត្ថកិច្ចជំនាញចុះមកអន្តរាគមន៍ធ្វើការវាស់វែងអូសយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រងចាំដោះស្រាយតាមនីតិវិធីច្បាប់ ។ ចំណែកបុរសដែលរងរបួសត្រូវបានសមត្ថកិច្ចហៅរថយន្តសាមុយមកដឹក យកទៅសង្គ្រោះ នៅមន្ទីរពេទ្យភ្លាមៗ៕ ជោគជ័យ