ខ្មែរនិងវៀតណាមមួយក្រុម ទៅលួចជីកកំណប់ នៅក្បាលស្ពានថ្មខេត្តបាត់ដំបង ដែលកប់ទុកអំឡុងឆ្នាំ១៩៨០

8:22 AM

ខេត្តបាត់ដំបង ៖ សមត្ថកិច្ចខេត្តបាត់ដំបងបានតាមប្រមាញ់ និងក្របួចចាប់ជនជាតិខ្មែរ២រូប និងជនជាតិវៀតណាមចំនួន៦រូប ទាំងព្រឹកព្រលឹម បន្ទាប់ពីពួកគេបានលួចឆ្លងដែនខុសច្បាប់ និងចូលទៅជីកកកាយរកកំណប់ ខាងក្រោយរូបតោក្បាលស្ពានថ្មចាស់ត្រើយខាងលិច ស្ថិតនៅខាងមុខសាលាខេត្ត ក្នុងភូមិកម្មករ សង្កាត់ស្វាយប៉ោ ក្រុងខេត្តបាត់ដំបង កាលពីចន្លោះម៉ោង២ទៅម៉ោង៣ទៀបភ្លឺ ឈានចូលថ្ងៃទី២២ ខែមិថុនាឆ្នាំ២០១៣ ។

សមត្ថកិច្ចបានបញ្ជាក់ថា ខណៈដែលសមត្ថកិច្ចកំពុងធ្វើការល្បាតតាមដងផ្លូវ ក៏បានប្រទះឃើញមានមនុស្សមួយក្រុម កំពុងធ្វើសកម្មភាពជីក កកាយនៅចំណុចក្បាលតោក្បែរស្ពាន។ ដោយមានការសង្ស័យសមត្ថកិច្ច បានដើរតម្រង់ទៅរកទីតាំងនោះ ក៏ស្រាប់តែពួកគេបានរត់បែកផ្លូវគ្នា ទៅរករថយន្តដែលពួកគេបានចតត្រៀមទុកនៅក្បែរនោះ ហើយបើករត់គេចយ៉ាងលឿនចេញពីចំណុចកើតហេតុ។ ប៉ុន្តែនៅសល់បក្ខពួក ម្នាក់ដែលកំពុងឈរនោមទើបសមត្ថកិច្ចក្របួចជាប់ ហើយបានរាយការណ៍ទៅកម្លាំងបង្ក្រាប ដើម្បីដេញតាមប្រមាញ់ទៅលើ រថយន្តម៉ាក ISUZU ស៊េរីឆ្នាំ២០១៣ ពណ៌ទឹកប្រាក់ពាក់ស្លាកលេខភ្នំពេញ 2V2238 ដែលបើកចេញពីក្រុងបាត់ដំបងឆ្ពោះទៅភ្នំពេញ។

សមត្ថកិច្ចបានតាមប្រដេញ តែរថយន្តរបស់ក្រុមជនសង្ស័យ នៅតែព្យាយាមរត់គេច ទើបសមត្ថកិច្ចស្រុកមោងឬស្សី បានចេញប្រតិបត្តិការជាបន្ទាន់ដោយយករថយន្ត ដាក់ជាបារាសនៅលើចំណុចស្ពានមោងយ៉ាងរឹងមាំ ត្រៀមលក្ខណៈដើម្បីបង្ក្រាប។ ខណៈដែលរថយន្តជនសង្ស័យមកដល់បានឈប់ ហើយនាំគ្នារត់ព្រោងព្រាត ក៏ត្រូវបានសមត្ថកិច្ចចាប់បញ្ជូនខ្លួន ទៅកាន់ការិយាល័យជំនាញនៃស្នងការដ្ឋាននគរបាល ខេត្តបាត់ដំបង ដើម្បីធ្វើការសាកសួរ។

ក្រុមដែលផ្សងសំណាងជីកកំណប់ទាំងនេះ រួមមាន ១-ឈ្មោះ លឹម ហុកណៃ ហៅតូនី ភេទប្រុស អាយុ៣៦ឆ្នាំ ជាជនជាតិខ្មែរ រស់នៅសង្កាត់ប៉ាយ៉ាប ខណ្ឌសែនសុខ ក្រុងភ្នំពេញ ២-ឈ្មោះ មាស សុភាព ភេទប្រុស អាយុ៥៥ឆ្នាំ រស់នៅក្រុងភ្នំពេញ អតីតមន្ត្រីយោធា ជនជាតិខ្មែរ ។ ដោយឡែកជនជាតិវៀតណាមចំនួន ៦នាក់រួមមាន ១-ឈ្មោះ កៅ សុនណាម ភេទប្រុស អាយុ៣៣ឆ្នាំ ២-ឈ្មោះ រឿង រ៉ុកហយ ភេទប្រុស អាយុ៥៧ឆ្នាំ អតីតកងទ័ពស្ម័គ្រចិត្តវៀតណាម ៣-ឈ្មោះ វៀង ចិនហុក ភេទប្រុសអាយុ២២ឆ្នាំ ៤-ឈ្មោះ រៀង វ៉ាន់ងៀង ភេទប្រុសអាយុ២៤ឆ្នាំ វៀតណាម ៥-ឈ្មោះ ទ្រឹង វ៉ាន់ វី ភេទប្រុសអាយុ៣៧ឆ្នាំ និង៦-ឈ្មោះ វៀង ធីដាន ភេទស្រី អាយុ៤០ឆ្នាំ ។

ឈ្មោះ លឹម ហុកណៃ ហៅតូនី បានសារភាពថា ខ្លួនគ្រាន់តែជាម្ចាស់រថយន្តដែលត្រូវឈ្មោះ មាស សុភាព ជួលឲ្យក្រុមវៀតណាមនោះតែប៉ុណ្ណោះ ក្នុងតំលៃ៣០០ដុល្លា រីឯពេលដែលចូលទៅជីកនោះ គឺខ្លួនដេកចាំនៅក្នុងរថយន្ត ។ ដោយឡែកឈ្មោះ មាស សុភាព បានរៀបរាប់ថា កាលពីអំឡុងឆ្នាំ១៩៨០ ឬ១៩៨១ ពេលដែលខ្លួននៅជានាយពលទាហានគឺបានឃើញឈ្មោះ វឿង វ៉ុកហយ ជាកងទ័ពវៀតណាម បានយកមាសចំនួន១កេះ ទៅជីកកប់នៅក្រោមរូបតោ ក្បាលស្ពាននេះ ទើបបែកគំនិតចង់បានកំណប់នោះ ប៉ុន្តែនៅពេលចូលទៅជីក បានជម្រៅប្រហែល១មែត្រ មិនទាន់ដល់ខាងក្រោមរូបតោផងនោះក៏ស្រាប់តែសមត្ថកិច្ចមកទាន់ ក៏រត់គេចខ្លួនតែម្តងទៅ៕

_________

ប្រភពពី វត្តភ្នំ