លោក សួង សុភ័ណ្ឌ អាយុ២៦ឆ្នាំ ដែលគេស្គាល់ថា ជាយុវជនជំនាន់ក្រោយនៃគណបក្សប្រឆាំងនិងជាបេក្ខជន តំណាងរាស្ដ្រពេញសិទ្ធិរបស់គណបក្សសង្គ្រោះជាតិនៅមណ្ឌលខេត្ដប៉ៃលិន សម្រាប់ការបោះឆ្នោតជ្រើសតាំងតំណាងរាស្ដ្រនីតិកាលទី៥ខាងមុខនេះ បានសម្រេចដាក់ពាក្យបណ្ដឹងទៅអយ្យការអមសាលាដំបូងរាជធានី ភ្នំពេញ កាលពីថ្ងៃទី២០ខែមិថុនាឆ្នាំ២០១៣ ដោយប្ដឹងប្រឆាំងនឹងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា អនុប្រធានគណបក្សប្រជាជនកម្ពុជា និងជាបេក្ខជនតំណាងរាស្ដ្ររបស់គណបក្សប្រជាជនកម្ពុជានៅមណ្ឌលខេត្ដកណ្ដាល ចោទប្រកាន់ពីបទក្លែងបន្លំឯកសារសាធារណៈ និងផ្ដើមគំនិតជាមួយបក្សពួក បណ្ដោយឱ្យជនជាតិយួនចូលស្រុកខ្មែរខុសច្បាប់។
ពាក្យបណ្ដឹងរបស់យុវជន សួង សុភ័ណ្ឌ បានរៀបរាប់ថា សព្វថ្ងៃមានជនជាតិយួនចូលមកកម្ពុជាខុសច្បាប់ដោយសេរី ហើយមានអត្ដសញ្ញាណប័ណ្ណសញ្ជាតិខ្មែរកាន់គ្រប់ដៃ ។
ស្ថាប័នអយ្យការអមសាលាដំបូងរាជធានីភ្នំពេញ បានទទួលពាក្យបណ្ដឹងរបស់លោក សួង សុភ័ណ្ឌ ជាដើមចោទនៅថ្ងៃទី២០ខែមិថុនាឆ្នាំ២០១៣ ដែលជាថ្ងៃចុះកាលបរិច្ឆេទបណ្ដឹងនោះដែរ ខណៈដែលលោក សួង សុភ័ណ្ឌ បានភ្ជាប់នូវឯកសារជារូបថតនិងខ្សែវីដេអូធ្វើជាព័ស្ដុតាងដាក់បន្ទុកនៅក្នុងពាក្យបណ្ដឹងរបស់លោក ។
នេះគឺជាពាក្យបណ្ដឹងលើកទីពីរហើយរបស់លោក សួង សុភ័ណ្ឌ ក្នុងនាមជាយុវជនជំនាន់ក្រោយ របស់គណបក្សនយោបាយប្រឆាំង ដែលបានប្ដឹងប្រឆាំងនឹង“សម្ដេចតេជោសែន”ជាបុរសខ្លាំងនៅកម្ពុជា ទៅស្ថាប័នតុលាការ ។
ពាក្យបណ្ដឹងចុះថ្ងៃទី៣០ខែវិច្ឆិកាឆ្នាំ២០១២កន្លងមក ជាពាក្យបណ្ដឹងលើកទីមួយ ដែលលោកសួង សុភ័ណ្ឌ ប្ដឹងប្រឆាំងនឹង“សម្ដេចតេជោសែន”ដោយចោទប្រកាន់បុរសខ្លាំងពីបទឃាតកម្មគិតទុកជាមុន ធ្វើឱ្យពលរដ្ឋខ្មែរស្លាប់ចំនួន៣៥៣នាក់ និងរងរបួសជាង៤០០នាក់នៅលើស្ពានពេជ្រនៃមជ្ឈមណ្ឌលកម្សាន្ដកោះពេជ្រ កាលពី រាត្រីនាថ្ងៃទី២២ខែវិច្ឆិកាឆ្នាំ២០១០។ ប៉ុន្ដែពាក្យបណ្ដឹងរបស់លោក សួង សុភ័ណ្ឌ នេះត្រូវបានតំណាងអយ្យការអមសាលាដំបូងរាជធានីភ្នំពេញ ដែលមានលោក មាស ច័ន្ទពិសិដ្ឋ ជាព្រះរាជអាជ្ញារង សម្រេចតម្កល់រឿងទុកឥតចាត់ការតាមដីកាសម្រេចលេខ១១៣៨អយធចុះថ្ងៃទី១៨ខែធ្នូឆ្នាំ២០១២ ខណៈដែលតុលាការមិនបានកោះហៅ“សម្ដេចតេជោសែន”ដែលជាជនសង្ស័យឱ្យចូលមកឆ្លើយបំភ្លឺដោះបន្ទុកនៅតុលាការទេ ។
ពាក់ព័ន្ធទៅនឹងពាក្យបណ្ដឹងលើកទីមួយរបស់លោក សួង សុភ័ណ្ឌ នេះដែរ“សម្ដេចតេជោសែន”ដែលជាជនសង្ស័យបានបញ្ចេញនូវប្រតិកម្មនាថ្ងៃទី០២ខែធ្នូឆ្នាំ២០១២(មុនពេលតុលាការសម្រេចតម្កល់រឿងទុកឥតចាត់ការ)ថា សម្ដេចនឹងប្រើប្រាស់សិទ្ធិជាពលរដ្ឋម្នាក់ប្ដឹងបកត្រឡប់វិញ ប្រសិនបើតុលាការរកមិនឃើញនូវកំហុសឆ្គងរបស់សម្ដេចដូចការចោទប្រកាន់ ។ ប៉ុន្តែ បន្ទាប់ពីតុលាការតម្កល់រឿងទុកឥតចាត់ការលើបណ្ដឹងរបស់លោក សួង សុភ័ណ្ឌរហូតមកទល់បច្ចុប្បន្ននេះគេមិនឃើញ“សម្ដេចតេជោសែន”ប្ដឹងបកមកលើលោក សួង សុភ័ណ្ឌ ជាដើមចោទវិញដូចការអះអាងឡើយ ។
ក្រុមអ្នកច្បាប់ឯករាជ្យនៅកម្ពុជា បានសាកល្បងទស្សន៍ទាយថា តាមស្ថានការណ៍របស់តុលាការស្រុកខ្មែរសព្វថ្ងៃ ទាក់ទងនឹងបណ្ដឹងរបស់លោក សួង សុភ័ណ្ឌ ជាដើមចោទ កុំថាឡើយតុលាការមិនហ៊ានចោទប្រកាន់(បើកការស៊ើបសួរ)ទៅលើ“សម្ដេចតេជាសែន” ឱ្យក្លាយជាជនត្រូវចោទនោះ សូម្បីតែត្រឹមកោះហៅ “សម្ដេចតេជោសែន”ជាជនសង្ស័យ ឱ្យចូលមកឆ្លើយបំភ្លឺដោះបន្ទុកនៅចំពោះមុខស្ថាប័នអយ្យការក៏តុលាការមិនហ៊ានក្អកផង ។ ករណីនេះ លោក សួង សុភ័ណ្ឌ ដែលជាដើមចោទ ក៏ទំនងជាបានយល់ច្បាស់លាស់រួចហើយដែរ ។
ទោះយ៉ាងណា ក្រុមអ្នកច្បាប់បានលើកឡើងថា នេះជាសេចក្ដីក្លាហានមួយរបស់យុវជនជំនាន់ក្រោយនៃគណបក្សប្រឆាំង ដែលហ៊ានប្ដឹងប្រឆាំងឬសាកល្បងកម្លាំងជាមួយ“សម្ដេចតេជាសែន” ជាបុរសខ្លាំងកម្ពុជានៅស្ថាប័នតុលាការ រហូតដល់ទៅចំនួនពីរលើក បើតុលាការមិនហ៊ានសម្រេចចោទប្រកាន់ទៅលើ“សម្ដេចតេជា សែន”ក៏ដោយ ។
មជ្ឈដ្ឋានអ្នកគាំទ្រនយោបាយគណបក្សប្រឆាំង បានសំណូមពរថា សូមឱ្យលោក សួង សុភ័ណ្ឌ ប្ដឹងមែនទែន កុំប្ដឹងលេងៗ ដើម្បីចង់បានតម្លៃខ្ល្ញួន រួចហើយរត់ទៅចុះចូលឬដង្ហែ”សម្ដេចតេជាសែន” ដូចអ្នកមុនៗមួយចំនួន ទៀត ៕
ប្រភពពី ដើមត្នោត
បញ្ជីឈ្មោះអ្នកបោះឆ្នោតនេះសូមអ្នកអានឆ្លើយមកតើជាជនជាតិយួនឬអ្វី ?
មនុស្សស្លាប់ចំនួន៣៥៣នាក់នៅលើស្ពានពេជ្រកាលពីឆ្នាំ២០១០កន្លងមក
ប្រភពពី៖ Cambodiapage.info
