មេបក្សប្រឆាំងក្នុងប្រទេសថៃ លោក អាប់ភីស៊ីត វ៉េចាជីវ៉ា បានផ្ញើសារជូនពរលោកស្រីនាយករដ្ឋមន្ត្រីថៃ យីងឡាក់ ស៊ីនណាវ៉ាត់ត្រា ក្នុងឳកាសខួបកំណើតរបស់លោកស្រី តាមរយៈទូរទស្សន៍ Blue Sky TV កាលពីថ្ងៃសុក្រ ម្សិលមិញ។ ក្នុងសារជូនពរ តាមរយៈទូរទស្សន៍បក្សប្រឆាំងមួយនេះ មានខ្លឹមសារថា «ខ្ញុំសូមជូនពរឲ្យលោកស្រីអាចធ្វើជានាយករដ្ឋមន្ត្រីថៃ បានពេញអាណត្តិ ដែលមានរយៈពេលបួនឆ្នាំ ហើយបញ្ចៀសនូវទង្វើទាំងឡាយណា ដែលបង្កជាបញ្ហាសម្រាប់ប្រទេស»។
គួរបញ្ជាក់ថា គិតត្រឹមថ្ងៃសុក្រ ម្សិលមិញ លោកស្រី យីងឡាក់ មានវ័យ៤៦ឆ្នាំហើយ។ ក្នុងឳកាសនោះដែរ លោកស្រីបានប្រាប់ក្រុមអ្នកសារព័ត៌មានថា លោកស្រីមានភាពនឿយហត់ ប៉ុន្តែនៅតែបន្តប្រឹងប្រែងអស់ពីលទ្ធភាព ដើម្បីបម្រើប្រទេសជាតិ។
រាជរដ្ឋាភិបាលថៃ ដែលដឹកនាំដោយលោកស្រី យីងឡាក់ កំពុងប្រឈមមុខនឹងការរិះគន់យ៉ាងខ្លាំង លើការខាតបង់ថវិការជាតិ ប្រមាណ១៣៦ពាន់លានបាត ដោយសារតែផែនការតំឡើងថ្លៃអង្កររបស់ប្រជាកសិករថៃ។ គួររម្លឹកថា លោកស្រី យីងឡាក់ បានដឹកនាំគណបក្ស ភឿថៃ យកជ័យជម្នះលើលោក អាប់ភីស៊ីត កាលពីការបោះឆ្នោត នាឆ្នាំ២០១១ ។
ក្នុងសារជូនពររបស់លោក អាប់ភីស៊ីត ម្សិលមិញនេះដែរ លោកថែមទាំងបានបង្ហាញថា គណបក្សប្រជាធិបតេយ្យ ដែលជាបក្សប្រឆាំងនោះ នឹងរង់ចាំការបោះឆ្នោតអាណត្តិក្រោយទៀត នាឆ្នាំ២០១៥ ខណៈដែលបក្ស ដឹកនាំដោយរូបលោកផ្ទាល់មួយនេះ ប៉ុនប៉ងរៀបចំ និងពង្រឹង យុទ្ធសាស្ត្ររបស់ខ្លួនឡើងវិញ ៕ បាងកកប៉ុស្តិ៍
ប្រភពពី ann
