ភ្នំពេញ: នៅព្រឹកថ្ងៃទី១៤ ខែមិថុនា ឆ្នាំ២០១៣នេះ អ្នកនាំពាក្យរាជរដ្ឋាភិបាលកម្ពុជា បានធ្វើការបញ្ជាក់ថា ការលើកឡើងរបស់អង្គការតម្លាភាពកម្ពុជា អំពី គណបក្សប្រជាជនកម្ពុជា បដិសេធមិនចូលរួមនៅក្នុងការចុះហត្ថលេខាលើការប្តេជ្ញាចិត្តប្រយុទ្ធប្រឆាំងអំពើពុករលួយនោះ គឺជាការមួលបង្កាច់ ខុសពីការពិតទាំងស្រុង ហើយលោកបានចាត់ទុកថា ការលើកឡើងរបស់អង្គការតម្លាភាពកម្ពុជានេះ មិនស័ក្តិសម ធ្វើជាសង្គមស៊ីវិល ដែលអាចឲ្យគេជឿទុកចិត្តបានទេ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរាជរដ្ឋាភិបាលកម្ពុជា បានធ្វើការបំភ្លឺពាក់ព័ន្ធករណីខាងលើនេះ នៅព្រឹកថ្ងៃទី១៤ ខែមិថុនា ឆ្នាំ២០១៣ នៅក្រសួងព័ត៌មាន បន្ទាប់ពីអង្គការតម្លាភាពកម្ពុជា បានប្រកាសនៅក្នុងសន្និសីទកាសែត ដែលធ្វើឡើង កាលពីថ្ងៃទី១២ ខែមិថុនា ឆ្នាំ២០១៣ ថា គណបក្សប្រជាជនកម្ពុជា ដែលជាគណបក្សកាន់អំណាច បានបដិសេធក្នុងការអញ្ជើញចូលរួមក្នុងពិធីប្តេជ្ញាចិត្តប្រយុទ្ធប្រឆាំងអំពើពុករលួយ។
ជាមួយគ្នានោះ លោក ខៀវ កាញារីទ្ធ បានបញ្ជាក់ថា “មិនមែនគណបក្សប្រជាជនមិនចុះហត្ថលេខាលើការសម្រេចចិត្តប្រយុទ្ធប្រឆាំងអំពើពុករលួយនោះទេ ហើយការមានសារព័ត៌មានមួយចំនួន ដូចជា កាសែត ឌឺ ខាំបូឌាដេលី និងភ្នំពេញប៉ុស្តិ៍ ដែលបានចុះផ្សាយជាការភ័ន្តច្រឡំ ហើយរាជរដ្ឋាភិបាលកម្ពុជា បច្ចុប្បន្ន បានដើរតាមមាគ៌ានយោបាយគណបក្សប្រជាជនកម្ពុជា”។
លោក ខៀវ កាញារីទ្ធ បានលើកឡើងទៀតថា “គណប្សប្រជាជនកម្ពុជា បានចុះអនុស្សរណៈនៃការយោគយល់គ្នា ជាមួយអង្គការប្រឆាំងអំពើពុករលួយរួចហើយ កាលពីឆ្នាំ២០១២ ហើយមិនមែនគណបក្សប្រជាជនកម្ពុជា មិនឲ្យតម្លៃលើសង្គមស៊ីវិលនោះទេ ហេតុនេះ ហើយបានជាគណបក្សប្រជាជនកម្ពុជា មិនចាំបាច់ទៅចុះហត្ថលេខាលើការប្តេជ្ញាចិត្តប្រយុទ្ធប្រឆាំងអំពើពុករលួយនោះទេ”។
លោក ខៀវ កាញារីទ្ធ បានសម្តែងនូវការសោកស្តាយ ចំពោះការចុះផ្សាយរបស់សារព័ត៌មាន ដូចជា កាសែត ឌឺ ខាំបូឌាដេលី និងភ្នំពេញប៉ុស្តិ៍ ដែលបានចុះផ្សាយធ្វើឲ្យមានការភ័ន្តច្រឡំ ហើយលោកក៏បានអះអាងថា “គណបក្សប្រជាជនកម្ពុជា ធ្វើគ្រប់យន្តការទាំងអស់ ដើម្បីប្រយុទ្ធប្រឆាំងអំពើពុករលួយ”៕
__________
ប្រភពពី CEN
