ភ្នំពេញ: លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងនៅព្រលប់ថ្ងៃទី២៤ ខែកក្កដា ឆ្នាំ២០១៣ ថា គជប បានធ្វើការឆ្លើយតបទៅលោកសម រង្ស៊ី វិញហើយ ចំពោះការស្នើសុំឲ្យពិនិត្យឡើងវិញ ក្នុងការបញ្ចូលឈ្មោះរបស់គាត់ ក្នុងបញ្ជីឈ្មោះអ្នកបោះឆ្នោតផ្លូវការ និងក្នុងបញ្ជីផ្លូវការបេក្ខជនឈរឈ្មោះបោះឆ្នោត។
លោក ទេព នីថា បានលើកឡើងថា អ្វីដែល គ.ជ.ប ធ្វើគឺអនុវត្តតាមច្បាប់បោះឆ្នោត។ គ.ជ.ប ពុំមានសមត្ថកកិច្ចធ្វើរឿងនេះទេ ពីព្រោះថា ក្រុមប្រឹក្សាធម្មនុញ្ញ ជាអ្នកសម្រេចចុងក្រោយ។
នៅថ្ងៃទី២៤ ខែកក្កដា ឆ្នាំ២០១៣ លោក សម រង្ស៊ី ក៏បានសរសេរលិខិតមួយច្បាប់ ជូនទៅក្រុមប្រឹក្សាធម្មនុញ្ញ ដើម្បីឲ្យក្រុមប្រឹក្សាធម្មនុញ្ញ ចេញការបញ្ជាក់ពីការរួចទោសរបស់លោក ហើយអាចនឹងឲ្យលោក អាចចុះឈ្មោះជាបេក្ខជនតំណាងរាស្ត្របាន៕
ប្រភពពី CEN
