មន្ត្រីរាជការនៅក្រសួងព័ត៌មាន បានដាក់ពាក្យបណ្ដឹងមួយទៅអង្គភាពប្រឆាំងអំពើពុករលួយ ឲ្យស៊ើបអង្កេតជុំវិញការប្រព្រឹត្តអំពើពុករលួយរបស់អនុរដ្ឋលេខាធិការទទួលបន្ទុកនាយកដ្ឋានបុគ្គលិក និងប្រធាននាយកដ្ឋានបុគ្គលិក និងបក្ខពួក ថាបានឃុបឃិតគ្នាទារលុយពីមន្ត្រីរាជការ ជាថ្នូរនឹងការសុំសិទ្ធិប្រឡងប្ដូរក្របខ័ណ្ឌមន្ត្រី។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ស្នើឲ្យលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ពិនិត្យ និងដោះស្រាយបន្ទាន់ចំពោះករណីបណ្ដឹងរបស់មន្ត្រីក្រសួងក្រោមឱវាទ ដែលបានប្ដឹងថាមានការប្រព្រឹត្តអំពើពុករលួយនៅក្នុងក្រសួងព័ត៌មាន។
ក្នុងលិខិតមួយដែលលោក ឱម យ៉ិនទៀង ផ្ញើទៅលោក ខៀវ កាញារីទ្ធ កាលពីថ្ងៃទី១០ ខែមិថុនា ដែលទើបតែចេញផ្សាយជាសាធារណៈ។ លោក ឱម យ៉ិនទៀង បញ្ជាក់ថា អង្គភាពប្រឆាំងអំពើពុករលួយបានទទួលពាក្យបណ្ដឹងពីមន្ត្រីរាជការនៅក្នុងក្រសួងព័ត៌មាន កាលពីថ្ងៃទី១ ខែឧសភា ដែលបានចោទប្រកាន់លោកជំទាវ នង បឿង ជាអនុរដ្ឋលេខាធិការទទួលបន្ទុកនាយកដ្ឋានបុគ្គលិក និងប្រធាននាយកដ្ឋានបុគ្គលិក និងបក្ខពួក ថាបានឃុបឃិតគ្នាទារលុយថ្លៃសុំសិទ្ធិប្រឡងចំនួន ៣ម៉ឺន ៥ពាន់រៀល ពីមន្ត្រីរាជការដាក់ពាក្យប្រឡងប្ដូរក្របខ័ណ្ឌក្នុងម្នាក់ និងបានទារលុយចន្លោះពី ៣០០ដុល្លារ ទៅ ១.២០០ដុល្លារ ជាថ្នូរនឹងការប្រឡងជាប់។
លោក ឱម យ៉ិនទៀង បញ្ជាឲ្យរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ពិនិត្យ និងដោះស្រាយករណីចោទប្រកាន់នេះ ហើយត្រូវផ្តល់ជារបាយការណ៍ទៅអង្គភាពប្រឆាំងអំពើពុករលួយ ដើម្បីឲ្យអង្គភាពនេះពិចារណាថា គួរបើក ឬមិនបើកការស៊ើបអង្កេត។
វិទ្យុអាស៊ីសេរី មិនអាចទាក់ទងសុំការបំភ្លឺពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានទេ នៅថ្ងៃទី១០ ខែកក្កដា ដោយលោកមិនលើកទូរស័ព្ទ។
នាយខុទ្ទកាល័យក្រសួងព័ត៌មាន លោក ឈុំ សុជាតិ យល់ថា លិខិតរបស់លោក ឱម យ៉ិនទៀង ទំនងជាលិខិតសម្ងាត់ ដែលផ្ញើទៅឲ្យគណៈកម្មការប្រឆាំងអំពើពុករលួយប្រចាំក្រសួងព័ត៌មាន ហើយលោកមិនបានដឹងចំពោះបណ្ដឹងរបស់បុគ្គលិកក្រសួងនោះឡើយ។
យ៉ាងណា លោកជឿថា ក្រសួងព័ត៌មាន នឹងមិនព្រងើយកន្តើយចំពោះលិខិតដែលអង្គភាពប្រឆាំងអំពើពុករលួយបានផ្ញើមកនោះទេ។ ប៉ុន្តែ វិធានការដោះស្រាយយ៉ាងណាចំពោះជនប្រព្រឹត្តិអំពើពុករលួយនោះ គឺសម្រេចទៅលើគណៈកម្មការប្រឆាំងអំពើពុករលួយប្រចាំក្រសួង ជាអ្នកសម្រេច៖ «ជាគោលការណ៍ យើងត្រូវតែគោរពទៅតាមលិខិតខាងអង្គភាពដែលគេផ្ញើជូនមកហើយ។ ប៉ុន្តែ វិធានការយ៉ាងណាៗ ចំពោះបុគ្គលនោះ គឺសម្រេចលើគណៈកម្មការខាងគណៈកម្មការពុករលួយនោះ គាត់បានបង្កើតក្រុមការងាររបស់គាត់មួយនៅតាមក្រសួងនានា អ៊ីចឹង ដូចជាខ្ញុំអ៊ីចឹង នៅខាងខុទ្ទកាល័យ ខ្ញុំអត់អាចលូកដៃចូលគណៈកម្មការនោះបានទេ»។
ក្រសួងនានាបានសម្រេចបង្កើតគណៈកម្មការប្រឆាំងអំពើពុករលួយតាមក្រសួង ដើម្បីស៊ើបអង្កេតករណីអំពើពុករលួយ ដែលគណៈកម្មការនេះត្រូវស្ថិតជាឯករាជ្យ។
ជុំវិញការស៊ើបអង្កេតករណីអំពើពុករលួយ ដែលធ្លាយចេញនៅក្រសួងព័ត៌មាន វិទ្យុអាស៊ីសេរី មិនអាចទាក់ទងរដ្ឋលេខាធិការក្រសួងព័ត៌មាន លោក អ៊ុក ប្រាថ្នា និងជាប្រធានគណៈកម្មការប្រឆាំងអំពើពុករលួយប្រចាំក្រសួងព័ត៌មាន បានទេ ដោយលោកមិនលើកទូរស័ព្ទ។
របាយការណ៍អង្គការតម្លាភាពអន្តរជាតិ កាលពីឆ្នាំ២០១២ រកឃើញថា កម្ពុជា ត្រូវបានចាត់ចូលក្នុងបណ្ដាប្រទេសដែលមានអំពើពុករលួយច្រើនជាងគេបំផុត គឺស្ថិតនៅលេខរៀងទី១៥៧ ក្នុងចំណោមប្រទេស១៧៤។ អង្គការនេះក៏ទើបតែរកឃើញថា មានស្ថាប័នចម្បងចំនួន៤ ដែលមានអំពើពុករលួយច្រើនជាងគេនៅកម្ពុជា គឺស្ថាប័នតុលាការ ប៉ូលិស មន្ត្រីសាធារណៈ និងគណបក្សនយោបាយ។ មន្ត្រីគណបក្សប្រឆាំងធ្លាប់អះអាងថា ថវិកាជាតិដែលបាត់បង់ដោយសារអំពើពុករលួយ មានចំនួនរាប់រយលានដុល្លារក្នុងមួយឆ្នាំៗ៕
ប្រភពពី RFA
