ខេត្ដកណ្ដាល ៖ មានហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយបានកើតឡើង កាលពីវេលាម៉ោង៣និង៣០នាទីរសៀល ថ្ងៃទី៣០ ខែកក្កដា ឆ្នាំ២០១៣ ស្ថិតនៅតាមបណ្ដោយផ្លូវជាតិលេខ៣ ចន្លោះគីឡូម៉ែត្រ លេខ២៤-២៥ ក្នុងភូមិកំពង់ទួល ឃុំអន្លង់រមៀត ស្រុកកណ្ដាលស្ទឹង ដែលបណ្តាលឲ្យមនុស្ស២នាក់បានស្លាប់បាត់បង់ជីវិតគួរឲ្យអាណោចអាធ័ម ដោយសារតែត្រូវរថយន្តម៉ាកទួរីសបើកបុកពេញទំហឹង។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនរងគ្រោះដែលបានស្លាប់បាត់បង់ជីវិតទាំង២នាក់នោះមានឈ្មោះ ខុម ទិត្យ ភេទប្រុស អាយុ៣០ឆ្នាំ រស់នៅភូមិត្រាំខ្នា ឃុំសុភី ស្រុកបាទី ខេត្ដតាកែវជាអ្នកបើកម៉ូតូ និងម្នាក់ទៀតមានឈ្មោះ ទាវ ហេង ភេទប្រុស អាយុ២២ឆ្នាំ រស់នៅក្នុងភូមិជាមួយគ្នា។ ចំណែកអ្នកបើកបររថយន្ត មានឈ្មោះ មុំ ហៀក ភេទប្រុស អាយុ៤៨ឆ្នាំ រស់នៅភូមិត្រែង ឃុំស្ដេចគង់ខាងជើង ស្រុកបន្ទាយមាស ខេត្ដកំពត។
ប្រភពដដែលបានបន្តឲ្យដឹងទៀតថា មុនពេលកើតហេតុគេបានឃើញរថយន្ដបង្កម៉ាកហ៊ីយ៉ាន់ដាយ ប្រភេទដឹកអ្នកដំណើរ១៥កៅអី ពណ៌សម្បកឪឡឹក ពាក់ស្លាកលេខភ្នំពេញ 2M-9543 ធ្វើដំណើរក្នុងទិសដៅពីជើងទៅត្បូង។ ខណៈពេលបើកមកដល់ចំណុចកើតហេតុស្រាប់តែរថយន្ត បានជ្រុលចង្កូតទៅបុកម៉ូតូជនរងគ្រោះម៉ាកហុងដា សេ១២៥ ពណ៌ខ្មៅ ពាក់ស្លាកលេខភ្នំពេញ 1BM-1576 ដែលកំពុងបើកបរក្នុងទិសដៅបញ្ច្រាសគ្នាពេញទំហឹង បណ្តាលឲ្យយុវជនទាំង២នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ។
បន្ទាប់ពីកើតហេតុ សមត្ថកិច្ចបានចុះទៅអន្តរាគមន៍ដើម្បីធ្វើការវាស់វែង និងនាំយកអ្នកបើកបររថយន្ត ព្រមទាំងវត្ថុតាងទៅកាន់អធិការដ្ឋាននគរបាលស្រុកអង្គស្នួលដើម្បីរង់ចាំធ្វើការដោះស្រាយទៅតាមនីតិវិធីច្បាប់។ ចំណែកសាកសពជនរងគ្រោះ ត្រូវបានសមត្ថកិច្ចប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕
________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
Read more: http://www.cambodiapage.info
0 comments:
Post a Comment