ព្រះសីហុនៈ បន្ទាប់ពីតុលាការក្រុងព្រះសីហនុបើកសវនាការជាលើកដំបូងកាលពីព្រឹកថ្ងៃទី១៥ ខែកក្កដានេះ លើបណ្តឹងរបស់ជនរងគ្រោះដូចជា តារាចម្រៀង ខេមរៈ សេរីមន្ត តារាកំប្លែងនាយកុយ យាយ ណាង និងជនរងគ្រោះមួយចំនួនទៀត ពាក់ព័ន្ធនឹងការបង្កគ្រោះថ្នាក់ចរាចរណ៍យ៉ាងធ្ងន់ធ្ងរ និងបណ្តាលមនុស្សជាច្រើននាក់ស្លាប់ភ្លាមៗដែលបង្កឡើងដោយរថយន្តកុងតឺន័ររបស់ក្រុមហ៊ុន SK (សុខ កន)នោះ តារាកំប្លែងនាយ កុយ បានបញ្ជាក់ឲ្យដឹងក្រោយសវនាការថា សាលក្រមនឹងប្រកាសនៅថ្ងៃព្រហស្បតិ៍ ទី១៨ កក្កដា ខាងមុខ ដោយលោកបញ្ជាក់ថា ជនរងគ្រោះសង្ឃឹមឈ្នះ ៩៩ ភាគរយ តែរឿងសំណងយ៉ាងណានោះ លោកមិនទាន់ដឹងនៅឡើយ។
គួររំឭកថា កាលពីវេលាម៉ោង៨ និង៣០នាទី យប់ថ្ងៃទី៧ មីនា ឆ្នាំ២០១៣កន្លងទៅនោះ តារាចម្រៀងឈរតំណែងកំពូល ខេមរៈ សិរីមន្ត រួមជាមួយនឹងក្រុមការងារ៨នាក់ (រួមមានក្មេងម្នាក់) បានធ្វើដំណើរតាមរថយន្តម៉ាក Tundra ពណ៌សពីរាជធានីភ្នំពេញទៅខេត្តព្រះសីហនុ ដើម្បីច្រៀងនៅក្នុងការប្រគំតន្ត្រីមួយ ហើយក៏បានជួបគ្រោះថ្នាក់ចរាចរណ៍ដ៏រន្ធត់មួយ នៅលើផ្លូវជាតិលេខ៤ ត្រង់ចំណុចគីឡូម៉ែត្រលេខ២១១-២១២ ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ។
គ្រោះថ្នាក់ដ៏រន្ធត់មួយនេះ បានបង្កឡើងដោយរថយន្តកុងតឺន័រក្រុមហ៊ុន SK បុកពេញទំហឹងទៅលើរថយន្តម៉ាក Tundra របស់តារាចម្រៀង ខេមរៈ សេរីមន្ត បណ្តាលឲ្យក្រុមការងាររបស់ពួកគេស្លាប់៤នាក់ភ្លាមៗ ក្នុងនោះមានកូនប្រុសតារាកំប្លែងល្បីឈ្មោះនាយ កុយ ម្នាក់ និងកូនប្រុសតារាចម្រៀងអាយ៉ៃយាយ ណាង ម្នាក់ផងដែរ។
សូមរង់ចាំអានព័ត៌មានពិស្តារក្នុងកាសែតភ្នំពេញប៉ុស្តិ៍
