ប៉ោយប៉ែត ៖ មានករណីភ្ញាក់ផ្អើលមួយ ដែលមនុស្សជាច្រើននាក់ចោមរោម ខណៈដែលស្ដ្រីម្នាក់បានចោទប្រកាន់ទៅ លើស្ដ្រីវ័យចំណាស់ថាជាមេខ្យល់នាំខ្លួន ទៅរកការងារធ្វើនៅប្រទេសថៃ ប៉ុន្ដែបែរជាយកទៅលក់ឱ្យធ្វើជាប្រពន្ធចុងរបស់ គេនៅស្រុកថៃ ទើបបង្ខំចិត្ដរត់ចេញពី ប្រទេសថៃមកកាន់ស្រុកកំណើតវិញ ។
ហេតុការណ៍ដែលស្ដ្រីម្នាក់ចោទ ប្រកាន់មេខ្យល់ថាយកខ្លួនទៅលក់នៅ ស្រុកថៃធ្វើជាប្រពន្ធចុងរបស់គេនោះ បានកើតឡើងកាលពីវេលាម៉ោង៩និង ៣០នាទីព្រឹកថ្ងៃទី១១ ខែកក្កដា ឆ្នាំ២០១៣ នៅចំណុចរង្វង់មូលច្រកអន្ដរជាតិប៉ោយ ប៉ែត ។
បើតាមការអះអាងពីស្ដ្រីរងគ្រោះថា ខ្លួនមានឈ្មោះថៃ វួចឆេង អាយុ៣៦ឆ្នាំ រស់នៅភូមិ-ឃុំខ្នៅ ស្រុកកងមាស ខេត្ដ កំពង់ចាម ខ្លួនត្រូវបានស្ដ្រីវ័យចំណាស់ ដែលមានឈ្មោះហែម ម៉ៅ អាយុ៦១ឆ្នាំ រស់នៅភូមិក្បាលស្ពាន សង្កាត់-ក្រុង ប៉ោយប៉ែត បាននាំទៅធ្វើការនៅប្រទេស ថៃជាអ្នកបម្រើតាមផ្ទះ ប៉ុន្ដែពេលដែល ខ្លួនទៅរស់នៅប្រទេសថៃបានចំនួន២០ ថ្ងៃ ថៅកែប្រុសរបស់ម្ចាស់ផ្ទះ(ជនជាតិ ថៃ)បានប្រាប់ថា មេខ្យល់ដែលនាំខ្លួនមក នោះបានយកប្រាក់មុនអស់ហើយចំនួន ៥ម៉ឺនបាត ។ ស្ដ្រីរូបនេះបន្ដថា ថៅកែ ប្រុសរបស់ម្ចាស់ផ្ទះមិនត្រឹមតែមិនបើក ប្រាក់ខែឱ្យប៉ុណ្ណោះទេ គេថែមទាំងមក ប្រាប់ខ្លួនថា បើចង់រួចបំណុលចំនួន៥ម៉ឺន បាតនេះ ត្រូវតែធ្វើជាប្រពន្ធចុងរបស់គេ ពីព្រោះស្ដ្រីឈ្មោះហែម ម៉ៅ បានលក់មក ឱ្យខ្លួនចំនួន៥ម៉ឺនបាត ទើបគេត្រឡប់ទៅស្រុកវិញ ។
ជនរងគ្រោះបានបន្ដថា ពេលដឹងថា មេខ្យល់យកមកលក់ឱ្យថៃធ្វើជាអ្នកបម្រើ និងជាប្រពន្ធចុងរបស់គេ ក៏បានព្យាយាម រត់គេចខ្លួនពីផ្ទះរបស់ថៅកែប្រុសខាង លើទៅជួបនឹងប្រជាពលរដ្ឋខ្មែរជាច្រើន ទៀតដែលជាអ្នកសុំទាន និងជាកម្មករ ខ្លួនក៏បានរៀបរាប់ប្រាប់អំពីដំណើរហេតុ ដែលលង់ខ្លួនមកទឹកដីថៃទាំងកម្មករ និង អ្នកសុំទានក៏មានចិត្ដអាណិតអាសូរ ប្រមូលប្រាក់ឱ្យមកខ្លួនចំនួន១ពាន់បាត ដើម្បីធ្វើជាមធ្យោបាយត្រឡប់មកស្រុក កំណើត ហើយចៃដន្យអីនៅព្រឹកថ្ងៃទី១១ ខែកក្កដា ឆ្នាំ២០១៣ ខ្លួនក៏បានប្រទះឃើញ មេខ្យល់រូបនេះរួចហើយក៏ទាមទារប្រាក់ ចំនួន៥ម៉ឺនបាត ដែលមេខ្យល់យកខ្លួន ទៅលក់ ទើបកើតជារឿងជេរប្រមាថ ដាក់បណ្ដាសាគ្នាផ្អើលដល់អ្នកក្រុងប៉ោយ ប៉ែតនៅចំណុចច្រកទ្វារអន្ដរជាតិប៉ោយ ប៉ែត ។
ក្រោយពីអ្នកទាំង២ឈ្លោះគ្នាស្ទើរបែក ផ្សែង ស្ដ្រីវ័យកណ្ដាលចោទប្រកាន់ទៅ លើស្ដ្រីវ័យចំណាស់ ឯស្ដ្រីវ័យចំណាស់ បានបដិសេធ ទើបនគរបាលសង្កាត់ ប៉ោយប៉ែតនាំអ្នកទាំង២មកកាន់អធិការ ដ្ឋាននគរបាលក្រុងប៉ោយប៉ែតដើម្បីរក ដំណោះស្រាយណាមួយថា តើការចោទ ប្រកាន់ខាងលើរបស់ស្ដ្រីរងគ្រោះការពិត ឬមួយយ៉ាងណា?
លោកអ៊ុំ សុផល អធិការនគរបាល ក្រុងប៉ោយប៉ែត បានប្រាប់នគរវត្ដតាម ទូរស័ព្ទកាលពីរសៀលថ្ងៃទី១១ ខែកក្កដា ឆ្នាំ២០១៣ថា រឿងនេះលោកបានដឹងមួយ ជំហានហើយថា មានស្ដ្រី២នាក់បាន ឈ្លោះទាស់ទែងគ្នា ហើយត្រូវបានកម្លាំង របស់លោកនាំខ្លួនមកសាកសួរ ប៉ុន្ដែ សមត្ថកិច្ចមិនទាន់លម្អិតរបាយការណ៍ ក្នុងរឿងនេះនៅឡើយទេ ៕
- ប្រភពពីនគរវត្ត
