ប៉េកាំង៖ មន្ត្រីអាជ្ញាធររបស់ចិន បានឲ្យដឹងនៅថ្ងៃពុធ ទី១៦ ខែមិថុនានេះ ថា ចំនួនសរុបនៃមនុស្ស ១.៥០០នាក់ បានបាត់បង់ជីវិត ឬបានបាត់ខ្លួននៅក្នុងគ្រោះមហន្តរាយធម្មជាតិនៅទូទាំងប្រទេសចិនកាលពីឆ្នាំមុន។
យោងតាមទីភ្នាក់ងារសារព័ត៌មានបរទេស ដែលបានចេញផ្សាយនៅថ្ងៃពុធ ទី១៩ ខែមិថុនា ឆ្នាំ២០១៣នេះ បានរាយការណ៌ដោយដងស្រង់នូវសេចក្តីប្រកាសព័ត៌មានរបស់ក្រសួងទំនាក់ទំនងកិច្ចការស៊ីវិល ក្នុងរបាយការណ៍ប្រចាំឆ្នាំលើសេវាសង្គម ថា គ្រោះមហន្តរាយធម្មជាតិកាលពីឆ្នាំមុន បានធ្វើឲ្យប៉ះពាល់ដល់មនុស្សចំនួន២៩០លាននាក់ ហើយបានបណ្តាលឲ្យខាតបង់សេដ្ឋកិច្ចដោយផ្ទាល់ច្រើនជាង៤១៨ពាន់លានយន់ ស្មើនិង៦៧.៧៧ពាន់លានដុល្លារអាមេរិក។
ក្នុងរបាយការណ៏ដដែលនោះ បានឲ្យដឹងទៀតថា ក្រសួងទំនាក់ទំនងកិច្ចការស៊ីវិល បានឲ្យដឹងថា គ្រោះមហន្តរាយធម្មជាតិ បានបង្ខំឲ្យមានការផ្លាស់ប្តូរទីកន្លែងរបស់ប្រជាពលរដ្ឋចំនួន១១លាននាក់ ហើយគ្រោះមហន្តរាយធម្មជាតិនេះ បានបំផ្លាញនូវដំណាំចំនួន២៥លានហិកតា។
គួរបញ្ជាក់ថា ក្រសួងទំនាក់ទំនងកិច្ចការស៊ីវិល និងហិរញ្ញវត្ថុ បានចំណាយទឹកប្រាក់ច្រើនជាង១១លានយន់ សំរាប់ជំនួយគ្រោះមហន្តរាយធម្មជាតិនេះកាលពីឆ្នាំមុន៕ សំណាង
ប្រភពពី៖ ABC+
