មាន សូនីតារងការរិះគន់ពីផលិតកម្មមួយចំនួនរឿងហៅថតមិនបាន

ភ្នំពេញៈ តារាសម្ដែងកញ្ញា មាន សូនីតា ត្រូវបានផលិតកម្មមួយចំនួនរិះគន់ថា នាងទទួលយកការសម្ដែងឲ្យតែអ្នកស្រី ពាន់ ភួងបុប្ផា តែមួយគត់ ។ ខណៈដែលផលិតកម្មផ្សេងទៀតទាក់ទងតែនាងមិនព្រមទទួល ។ នាងក៏ច្រានចោលចំពោះការចោទប្រកាន់នេះ ព្រោះជាភាពចៃដន្យរាល់ការទាក់ទងរបស់ផលិតកម្មមកចំតែពេលនាងរវល់ ។

ក្នុងជំនួបកាលពីពេលថ្ងៃសម្ពោធដាក់បញ្ចាំងរឿងកុមារី២៥ឆ្នាំវគ្គ២កន្លងទៅ កញ្ញា មាន សូនីតា បានឲ្យដឹងថា ក្នុងនាមជាតារាសម្ដែងម្នាក់ នាងមិនបានរើសអើងការសម្ដែងឲ្យផលិតកម្មណាមួយនោះឡើយ សំខាន់ឲ្យតែមានពេលគ្រប់គ្រាន់ គឺនាងច្បាស់ទទួលគ្រប់ទាំងអស់ ។ កញ្ញាបន្តថា នាងអត់រើសអើងការសម្ដែងឲ្យផលិតកម្មណាមួយឡើយ បើទោះបីជានាងមានទំនាក់ទំនងល្អជាមួយនឹងអ្នកស្រីពាន់ ភួងបុប្ផា ក្ដី។ នាងប្រាប់ថា កន្លងមកអ្នកស្រីពាន់ ភួងបុប្ផា ក៏មិនដែលដាក់គំនាបហាមមិនឲ្យនាងទៅថតឲ្យផលិតកម្មណាផ្សេងនោះដែរ។
ជាមួយនឹងស្នាមញញឹម កញ្ញា មាន សូនីតា លើកឡើងបន្តថា កន្លងមកនាងពិតជាបានបដិសេធមិនសម្ដែងឲ្យផលិតកម្មមួយចំនួន ដែលបានទាក់ទងនាងពិតប្រាកដមែន។ ប៉ុន្តែការបដិសេធនេះ គឺចំពេលម្ចាស់ផលិតកម្មមកទាក់ទងនាងថត ត្រូវនឹងពេលនាងកំពុងតែជាប់ដៃថតរឿងឲ្យអ្នកស្រី ពាន់ ភួងបុប្ផា ទើបធ្វើឲ្យនាងមិនអាចទទួលយកបាន ។

តួឯកស្រីក្នុងរឿង “អ្នកមានគុណ”រូបនេះបានបន្ថែមទៀតថា ធម្មតាអ្នកសិល្បៈ ពិតជាសប្បាយចិត្តខ្លាំងណាស់នៅពេលដែលមានអ្នកដឹកនាំរឿងហៅទៅថតនោះ មិនថាការសម្ដែងខារ៉ាអូខេ ស្ប៉តពាណិជ្ជកម្ម ឬរឿងឡើយ។ នាងបន្តថា កន្លងមកនាងធ្លាប់បានសម្រេចភ្ជួរការសិក្សាមួយរយៈ ដើម្បីមកថតរឿងឲ្យអ្នកស្រី ពាន់ ភួងបុប្ផា ទាំងនេះក៏ព្រោះតែស្រលាញ់សិល្បៈ។
ទន្ទឹមនេះ កញ្ញា មាន សូនីតា បានមកបន្តការសិក្សារបស់នាងវិញហើយ។ បច្ចុប្បន្ន នាងកំពុងតែសិក្សាឆ្នាំទី៣ ផ្នែកជំនួញ នៅសាកលវិទ្យាល័យបញ្ញាសាស្ត្រកម្ពុជា។ នៅសល់តែ១ឆ្នាំទៀតប៉ុណ្ណោះ នាងនឹងត្រូវបញ្ចប់ថ្នាក់បរិញ្ញាបត្រ ។ កញ្ញាបន្តថា នៅឆ្នាំទី៤ដែលជាឆ្នាំបញ្ចប់ថ្នាក់បរិញ្ញាបត្រ នាងត្រូវសរសេរសារណា ដូច្នេះទាមទារពេលវេលាច្រើន ទាំងការសិក្សាស្រាវជ្រាវមេរៀន ក៏ដូចជាចុះកម្មសិក្សា ហេតុនេះនាងមិនសូវហ៊ានទទួលការសម្ដែងនោះឡើយ ។ បន្ទាប់ពីបញ្ចប់ការសិក្សា នាងនឹងទទួលយកការសម្ដែងដូចដើមវិញ។ ចំណែកការងារទាក់ទងនឹងការសិក្សារបស់នាង ក៏នាងត្រូវតែធ្វើដែរ ព្រោះទៅថ្ងៃអនាគត នាងមិនអាចពឹងពាក់អាជីពជាអ្នកសិល្បៈមួយមុខបាននោះឡើយ។វិរៈ

តួឯកស្រីដ៏ស្រស់ស្អាតរូបនេះបន្ថែមថា ការបដិសេធទទួលការសម្ដែងនេះមិនមែនមានន័យថា នាងឈប់ទទួលទាំងអស់នោះឡើយ ។ បច្ចុប្បន្នមានផលិតកម្មមួយចំនួនទាក់ទងនាង តែនាងទទួលយកតិចតួចប៉ុណ្ណោះ មិនហានទទួលច្រើនដូចមុននោះឡើយ។ នាងលើកឡើងថា រាល់ការសម្ដែងនាងចង់ធ្វើឲ្យមានគុណភាព តែបើអត់មានពេលគ្រប់គ្រាន់ទេ នាងមិនចេះតែទទួលធ្វើឲ្យតែរួចពីដៃនោះឡើយ ។
សូមរំលឹកថា កញ្ញា មាន សូនីតា គឺជាអតីត Freshie លេខ៤ ជំនាន់ទី៨ ឆ្នាំ២០០៩ របស់ស្ថានីយទូរទស្សន៍កងយោធពលខេមរភូមិន្ទប៉ុសិ៍លេខ៥ ។ ក្រៅពីថតស្ប៉តពាណិជ្ជ កម្មមួយចំនួន និងធ្លាប់ធ្វើជាពិធីការិនី នាងក៏ធ្លាប់បានសម្ដែងខ្សែភាពយន្តចំនួន៣រឿងផងដែរ។ ខ្សែភាពយន្តទាំង៣រឿងនោះ នាងក្ដាប់បានដំណែងតួឯកទាំងអស់ ក្នុងនោះមានរឿង “បេះដូងអ្នកការពារ”, “នាយឡប់ជំពប់ស្នេហ៍”, និងរឿង “អ្នកមានគុណ”៕វិរៈ